മുംബൈ : ഇന്ത്യൻ ടീമിലേക്കുള്ള മലയാളി വിക്കറ്റ് കീപ്പർ ബാറ്റർ സഞ്ജു സാംസണിന്റെ മടങ്ങിവരവ് സമൂഹ മാദ്ധ്യമങ്ങളിൽ ആഘോഷമാക്കി ആരാധകർ. ടീം പ്രഖ്യാപനം വന്ന് ഞൊടിയിടയിൽ സഞ്ജു സാംസൺ ട്വിറ്ററിൽ ട്രെൻഡിങ്ങായി. വെസ്റ്റിൻഡീസിനെതിരായ ഏകദിന പരമ്പരയ്ക്കുള്ള 17 അംഗ ടീമിലാണ് സഞ്ജു സ്ഥാനം പിടിച്ചിരിക്കുന്നത്. വിക്കറ്റ് കീപ്പറായി മറ്റൊരു യുവതാരം ഇഷാൻ കിഷനും ടീമിലുണ്ടെങ്കിലും. വിക്കറ്റ് കാക്കാൻ സഞ്ജു തന്നെയാകും ഇറങ്ങുക എന്ന പ്രതീക്ഷയിലാണ് ആരാധകർ തന്നെ സഞ്ജുവിന് കളിക്കാൻ സാധിക്കുമെന്ന പ്രതീക്ഷയിലാണ് ആരാധകർ. ഏകദിന ടീമിൽ വിക്കറ്റ് കീപ്പറായി യുവതാരം ഇഷാൻ കിഷനുമുണ്ട്.
ഏഷ്യാ കപ്പ് ക്രിക്കറ്റും ഏകദിന ലോകകപ്പും പടിവാതിൽക്കൽ എത്തി നിൽക്കെ വെസ്റ്റിന്ഡീസിനെതിരെ മികച്ച പ്രകടനം കാഴ്ച വച്ചാൽ താരത്തിന് ഏഷ്യ കപ്പ് – ഏകദിന ലോകകപ്പ് ടീമിലെത്താൻ സാധിക്കും. അതേസമയം അഞ്ച് ട്വന്റി20 മത്സരങ്ങൾക്കുള്ള ഇന്ത്യൻ ടീമിനെ നിലവിൽ ബിസിസിഐ പ്രഖ്യാപിച്ചിട്ടില്ല. ട്വന്റി20 ടീമിലും സഞ്ജുവിന് ബിസിസിഐ അവസരം നൽകുമെന്നാണു കരുതുന്നത്. ‘ജസ്റ്റിസ് ഫോർ സഞ്ജു സാംസൺ’ ട്വിറ്ററിൽ ട്രെൻഡിങ് ആക്കാതിരുന്ന ബിസിസിഐയ്ക്ക് നന്ദി എന്നാണ് ഒരു ആരാധകൻ ട്വിറ്ററിൽ കുറിച്ചത്.
ഏകദിനത്തിൽ ഇന്ത്യയ്ക്കായി 11 മത്സരങ്ങളിൽ നിന്നായി രണ്ട് അർധ സെഞ്ചറികളടക്കം 330 റൺസ് സഞ്ജു തന്റെ പേരിൽ കുറിച്ചിട്ടുണ്ട്. കഴിഞ്ഞ വർഷം ന്യൂസീലൻഡിനെതിരായ പരമ്പരയിലാണ് സഞ്ജു അവസാനമായി ഏകദിന ക്രിക്കറ്റിൽ രാജ്യത്തിനായി കളിക്കാനിറങ്ങിയത്.