മുംബൈ : ഓൺലൈൻ ഗെയിമിങ് പ്ലാറ്റ്‌ഫോമായ ഡ്രീം 11 ഇന്ത്യന്‍ ക്രിക്കറ്റ് ടീമിന്റെ പ്രധാന സ്പോണ്‍സര്‍മാരാകും. മുഖ്യ സ്പോൺസർ സ്ഥാനത്ത് നിന്ന് ബൈജൂസ് പിന്മാറുന്നതോടെയാണ് ആ സ്ഥാനത്ത് ഡ്രീം 11 എത്തുന്നത്. അടുത്ത മൂന്ന് വര്‍ഷത്തേക്കാണ് ഇന്ത്യന്‍ ടീമിന്റെ പ്രധാന സ്പോണ്‍സര്‍ സ്ഥാനം ഡ്രീം 11 സ്വന്തമാക്കിയത്. അതേസമയം എത്ര കോടി രൂപയ്ക്കാണ് സ്പോണ്‍സര്‍ അവകാശം ഡ്രീം 11 സ്വന്തമാക്കിയതെന്ന് ബിസിസിഐ വ്യക്തമാക്കിയിട്ടില്ല. 358 കോടി രൂപയാണ് കരാര്‍ തുകയെന്നാണ് അനൗദ്യോഗിക റിപ്പോര്‍ട്ട്. വിന്‍ഡിസിനെതിരായ ടെസ്റ്റ് പരമ്പര മുതല്‍ ഡ്രീം 11 സ്പോണ്‍സേര്‍ഡ് കിറ്റ് അണിഞ്ഞാവും ഇന്ത്യൻ ടീം കളത്തിലിറങ്ങുക.
‘‘ഇന്ത്യൻ ടീമിന്റെ പ്രധാന സ്പോൺസർമാരാകുന്നത് അഭിമാനമുണ്ടാക്കുന്ന കാര്യമാണ്. ഇന്ത്യൻ കായിക മേഖലയെ പിന്തുണയ്ക്കുന്നതു തുടരും.’’– ഡ്രീം ഇലവൻ സിഇഒ ഹർഷ് ജെയിൻ പ്രതികരിച്ചു
