പാലക്കാട്‌ : തദ്ദേശസ്ഥാപനങ്ങളിലെ അധ്യക്ഷൻമാരെ തിരഞ്ഞെടുക്കുന്നതിൽ ഒരിടത്തും യുഡിഎഫിനും എൽഡിഎഫിനും പിന്തുണ നൽകില്ലെന്ന് ബിജെപി നേതൃത്വം. തദ്ദേശസ്ഥാപനങ്ങളിൽ ബിജെപി അംഗങ്ങളുടെ വോട്ട് നിർണായകമാണെങ്കിലും ഒരു സാഹചര്യത്തിലും പാർട്ടിയുടെ നിലപാടിൽ മാറ്റം വരുത്തേണ്ടന്നാണ് ബിജെപിയുടെ തീരുമാനം. സംസ്ഥാന ഭാരവാഹികളുടെ ഓൺലൈൻ യോഗത്തിലായിരുന്നു ഈ പുതിയ തീരുമാനം കൈക്കൊണ്ടത്.
എന്നാല്‍ പ്രസിഡന്റ്, വൈസ് പ്രസിഡന്റ് സ്ഥാനങ്ങളിലേക്ക് സാധ്യമായ സ്ഥലത്തെല്ലാം പാർട്ടി അംഗങ്ങളും മത്സരിക്കും. പാർട്ടി അംഗങ്ങൾക്ക് വോട്ടെടുപ്പിൽ നേതൃത്വം വിപ്പു നൽകും. അതേസമയം ഭരണത്തിന് ബിജെപി സഹായം ആവശ്യമുള്ള മറ്റു പാർട്ടിയിലുള്ളവരും മുന്നണി സ്വതന്ത്രരും അവരുടെ രാഷ്ട്രീയ നിലപാടിൽ മാറ്റം വരുത്താൻ തയ്യാറായാൽ അവരെ പിന്തുണയ്ക്കുന്നത് ആലോചിക്കാമെന്നാണ് പാർട്ടി തീരുമാനിച്ചിട്ടുള്ളത്. എന്നാൽ ബിജെപിക്ക് പ്രസിഡന്റ്, വൈസ് പ്രസിഡന്റ് സ്ഥാനം ലഭിക്കണമെന്നാണ് വ്യവസ്ഥയാണ് ഇതിനായി മുന്നോട്ടു വച്ചിട്ടുളളത്.
