തിരുവനന്തപുരം: വിലക്കയറ്റവും പ്രകൃതി ദുരന്തങ്ങളും മൂലം ജനം നട്ടം തിരിയുമ്പോൾ പ്രളയസെസ് അടിച്ചേല്പിക്കാനുള്ള നീക്കം ക്രൂരതയെന്ന് പ്രതിപക്ഷ നേതാവ് രമേശ് ചെന്നിത്തല. ഇതിനോടകം പല പേരുകളില് സർക്കാർ അധികനികുതി ഈടാക്കുന്നുണ്ട്. ബജറ്റ് വഴിയും 1785 കോടിയുടെ അധിക നികുതി അടിച്ചേല്പിച്ചു. സേവനനികുതി അഞ്ച് ശതമാനം ഏര്പ്പെടുത്തിയത് കൂടാതെയാണ് അധികനികുതി. തെരഞ്ഞെടുപ്പില് തോൽപിച്ചതിന് ജനങ്ങളോടുള്ള പ്രതികാരമാണ് അധികനികുതിയുടെ പേരില് അടിച്ചേല്പിക്കുന്നതെന്നും ചെന്നിത്തല ആരോപിച്ചു.
കുടിശ്ശിക നികുതി പിരിച്ചെടുക്കാന് കഴിവില്ലാത്ത ധനവകുപ്പാണ് ജനങ്ങളെ കൂടുതല് പിഴിയുന്നത്. മുഖ്യമന്ത്രിയുടെ ദുരിതാശ്വാസ നിധിയിലേക്ക് ഇതിനകം ലഭിച്ച സംഭാവനകള് ഉപയോഗിച്ച് അര്ഹര്ക്ക് സഹായം നല്കുന്നതില് സര്ക്കാർ പരാജയപ്പെട്ടു. പുനരധിവാസ പ്രവര്ത്തനത്തിന് ലഭിച്ച തുകയിൽ നിന്ന് ഒരു രൂപ പോലും ചെലവഴിക്കാത്ത കഴിവുകെട്ട സര്ക്കാർ വീണ്ടും ജനങ്ങള്ക്കുമേല് കുതിരകയറുന്നു. ഇപ്പോഴും പ്രളയത്തിൻറെ ദുരിതം അനുഭവിക്കുന്ന ജനങ്ങളുടെ രോഷമാണ് തിരഞ്ഞെടുപ്പിൽ തെളിഞ്ഞതെന്നും അദ്ദേഹം പ്രസ്താവനയിൽ പറഞ്ഞു.
