തിരുവനന്തപുരം: കേരളത്തിൽ കൊവിഡ് (Covid) നിയന്ത്രണങ്ങളില് കൂടുതല് ഇളവുകളുമായി സര്ക്കാര്. തുറന്ന ഇടങ്ങളിൽ നടത്തുന്ന പൊതുപരിപാടികളിൽ പരമാവധി 300 പേരെയും ഹാളുകൾ പോലെ അടച്ചിട്ട സ്ഥലങ്ങളിൽ നടത്തുന്ന പരിപാടികൾക്ക് പരമാവധി 150 പേരെയും അനുവദിക്കുമെന്ന് മുഖ്യമന്ത്രി പിണറായി വിജയൻ അറിയിച്ചു. കൊവിഡ് അവലോകന യോഗത്തിലാണ് തീരുമാനം.
ഉത്സവങ്ങളുമായി ബന്ധപ്പെട്ട ആചാരപരമായ കലാരൂപങ്ങള് നടത്തുവാനും അനുമതി നല്കി. വിവാഹങ്ങള്, മരണാനന്തര ചടങ്ങുകള് എന്നിവയ്ക്ക് തുറന്ന ഇടങ്ങളില് പരമാവധി 200 പേര്ക്കും അടഞ്ഞ ഇടങ്ങളില് പരമാവധി 100 പേര്ക്കും അനുമതിയെന്ന നിലവിലെ നിയന്ത്രണം തുടരുമെന്നും മുഖ്യമന്ത്രി അറിയിച്ചു. സ്കൂളുകള് പൂര്ണതോതില് തുറക്കുന്ന കാര്യം ഇപ്പോള് പരിഗണനയിലില്ലെന്ന് മുഖ്യമന്ത്രി അറിയിച്ചു.
സംസ്ഥാനത്ത് 97 ശതമാനം പേര് ആദ്യ ഡോസ് വാക്സിനും 70 ശതമാനം പേര് രണ്ടാം ഡോസ് വാക്സിനും സ്വീകരിച്ചിട്ടുണ്ടെന്നും മുഖ്യമന്ത്രി അവലോകന യോഗത്തില് പറഞ്ഞു. 70 ലക്ഷം പേര്ക്ക് രണ്ടാം ഡോസ് വാകാസീന് നല്കാനുണ്ടെന്നും അത് എത്രയും വേഗം പൂര്ത്തീകരിക്കാന് മുഖ്യമന്ത്രി ആരോഗ്യ വകുപ്പിനോട് നിര്ദ്ദേശിക്കുകയും ചെയ്തിട്ടുണ്ട്.
