അന്താരാഷ്ട്ര ക്രിക്കറ്റ് കൗൺസിൽ വരാനിരിക്കുന്ന 2026-ലെ പുരുഷ ടി20 ലോകകപ്പിൽ നിന്ന് ബംഗ്ലാദേശിനെ ഒഴിവാക്കി സ്കോട്ട്ലൻഡിനെ ഉൾപ്പെടുത്തിയതിന് പിന്നാലെ ബംഗ്ലാദേശ് ക്രിക്കറ്റ് ബോർഡിൽ നിർണ്ണായക ഭരണപരമായ നീക്കങ്ങൾ. വിവാദങ്ങൾക്കും അച്ചടക്ക നടപടികൾക്കും വിധേയനായിരുന്ന ഡയറക്ടർ എം. നജ്മുൽ ഇസ്ലാമിനെ ബോർഡിന്റെ ധനകാര്യ സമിതി അദ്ധ്യക്ഷനായി ബിസിബി വീണ്ടും നിയമിച്ചു.
നജ്മുൽ ഇസ്ലാമിന് നൽകിയ കാരണം കാണിക്കൽ നോട്ടീസിന് അദ്ദേഹം നൽകിയ മറുപടി തൃപ്തികരമാണെന്ന് കണ്ടെത്തിയതിനെത്തുടർന്നാണ് അച്ചടക്ക സമിതി ഈ തീരുമാനമെടുത്തത്. ഫെബ്രുവരി 7-ന് ആരംഭിക്കുന്ന ലോകകപ്പിന് മുന്നോടിയായി ബോർഡിനുള്ളിലെ ആഭ്യന്തര പ്രശ്നങ്ങൾ പരിഹരിക്കാനാണ് ബിസിബിയുടെ നീക്കം.
അതേസമയം, ഇന്ത്യയിൽ നടക്കാനിരിക്കുന്ന ലോകകപ്പിൽ നിന്ന് ബംഗ്ലാദേശിനെ മാറ്റി സ്കോട്ട്ലൻഡിനെ ഉൾപ്പെടുത്തിയ ഐസിസിയുടെ തീരുമാനത്തെ ചോദ്യം ചെയ്യേണ്ടതില്ലെന്ന് ബിസിബി ഔദ്യോഗികമായി തീരുമാനിച്ചു. ശനിയാഴ്ച ധാക്കയിൽ ചേർന്ന ബോർഡ് യോഗത്തിന് ശേഷം ബിസിബി മീഡിയ കമ്മിറ്റി ചെയർമാൻ അംജദ് ഹുസൈനാണ് ഇക്കാര്യം മാധ്യമങ്ങളെ അറിയിച്ചത്. സുരക്ഷാ കാരണങ്ങളാലോ രാഷ്ട്രീയ സാഹചര്യങ്ങളാലോ ടീമിനെ ഇന്ത്യയിലേക്ക് അയക്കാൻ സാധിക്കില്ലെന്ന ബംഗ്ലാദേശ് സർക്കാരിന്റെ തീരുമാനത്തെത്തുടർന്നാണ് ഐസിസി ഇത്തരമൊരു നടപടി സ്വീകരിച്ചത്. മത്സരങ്ങൾ ശ്രീലങ്കയിലേക്ക് മാറ്റാൻ സാധിക്കില്ലെന്ന് ഐസിസി വ്യക്തമാക്കിയതോടെ, നിലവിലെ ഫിക്സ്ചർ അനുസരിച്ച് കളിക്കാൻ സാധിക്കില്ലെന്ന് ബിസിബി ഐസിസിയെ വിനയപൂർവ്വം അറിയിക്കുകയായിരുന്നു.
ഐസിസിയുടെ തർക്ക പരിഹാര സമിതിയെ സമീപിക്കാൻ ബിസിബി ആദ്യം ആലോചിച്ചിരുന്നെങ്കിലും, സർക്കാർ നിലപാട് കർശനമായതോടെ ആ നീക്കം ഉപേക്ഷിച്ചു. ഐസിസി ബോർഡ് മീറ്റിംഗിന് പിന്നാലെ നടന്ന ബംഗ്ലാദേശ് കാബിനറ്റ് യോഗത്തിലാണ് ഇന്ത്യയിലേക്ക് ടീമിനെ അയക്കേണ്ടതില്ലെന്ന അന്തിമ തീരുമാനം കൈക്കൊണ്ടത്. ഈ സാഹചര്യം കണക്കിലെടുത്ത് അന്താരാഷ്ട്ര തലത്തിൽ കൂടുതൽ നിയമപോരാട്ടങ്ങൾക്കോ ആർബിട്രേഷനോ തങ്ങൾ തയ്യാറല്ലെന്നും സ്കോട്ട്ലൻഡ് പകരക്കാരായി വരുന്നത് അംഗീകരിക്കുന്നുവെന്നും ബിസിബി വ്യക്തമാക്കി.
