ശ്രീകണ്ഠപുരം: പയ്യാവൂര് കരിമ്പക്കണ്ടി പുഴയില് വീണ് കാണാതായ കൃഷി ഓഫിസറുടെ മൃതദേഹം കണ്ടെത്തി. കരിമ്പക്കണ്ടിയിലെ മല്ലിശേരി അനില് കുമാറിന്റെ (33) മൃതദേഹമാണ് വെമ്ബുവ പാലത്തിന് സമീപം കണ്ടെത്തിയത്. ഇരിക്കൂര് കൃഷി ഓഫിസിലെ സീനിയര് കൃഷി അസിസ്റ്റന്റാണ് അനില്കുമാര്. 12ന് രാത്രി 7.30ഓടെയാണ് അനില്കുമാര് പുഴയില് വീണത്. കടയില്നിന്ന് സാധനങ്ങള് വാങ്ങി വീട്ടിലേക്ക് വരുമ്ബോള് കരിമ്പക്കണ്ടിയിലെ മുള കൊണ്ടുണ്ടാക്കിയ നടപ്പാലത്തില്നിന്ന് കാല് വഴുതി പുഴയില് വീഴുകയായിരുന്നു.
രണ്ടു ദിവസമായി അഗ്നിരക്ഷാസേനയും പൊലീസും നാട്ടുകാരും തിരച്ചില് നടത്തിയെങ്കിലും മൃതദേഹം കണ്ടെത്താന് കഴിഞ്ഞില്ല. അതിനിടെ വെമ്ബുവ പാലത്തിന്റെ താഴെ മുള്ക്കാടിനടുത്തുവെച്ച് അനില്കുമാറിന്റെ പണമടങ്ങിയ ബാഗ് ബുധനാഴ്ച കണ്ടെത്തി. ഇതിന് സമീപത്തുനിന്നായാണ് വെള്ളിയാഴ്ച പുലര്ച്ച 3.15ഓടെ നാട്ടുകാര് മൃതദേഹം കണ്ടെത്തിയത്.
മുള്ക്കാടില് കുടുങ്ങിപ്പോയ മൃതദേഹം വെള്ളം ഇറങ്ങിയതോടെ പാലത്തിന് സമീപം ഒഴുകിയെത്തിയതാണെന്ന് കരുതുന്നു. കരിമ്പക്കണ്ടി പുഴക്ക് കോണ്ക്രീറ്റ് നടപ്പാലം പണിയാന് തുടങ്ങിയിട്ട് കാലം ഏറെയായെങ്കിലും പണി പാതിവഴിയില് നിലച്ചിരിക്കുകയാണ്. അതിനാല് നാട്ടുകാര്ക്ക് ഇപ്പോഴും ആശ്രയം മുളപ്പാലമാണ്. ഇതാണ് അപകടത്തിന് വഴിവെച്ചത്.