Tuesday, November 17, 2026

നടിയെ ആക്രമിച്ച കേസ്: കോടതി രേഖകൾ ദിലീപിന്റെ ഫോണിൽ നിന്ന് ലഭിച്ച സംഭവത്തിൽ അന്വേഷണം ശക്തമാക്കാന്‍ ക്രൈംബ്രാഞ്ച്

കൊച്ചി: നടിയെ ആക്രമിച്ച കേസിലെ കോടതി രേഖകൾ നടൻ ദിലീപിന്റെ ഫോണിൽ നിന്ന് ലഭിച്ചതിന് പിന്നാലെ സംഭവത്തെ കുറിച്ച് അന്വേഷിക്കാൻ ക്രൈംബ്രാഞ്ച്. കോടതി ജീവനക്കാരെ കേന്ദ്രീകരിച്ചായിരിക്കും പ്രധാന അന്വേഷണം എന്നാണ് പുറത്ത് വരുന്ന റിപ്പോർട്ടുകൾ. ജീവനക്കാരെ ചോദ്യംചെയ്യുന്നതിനായി വിചാരണക്കോടതിയുടെ അനുമതി തേടുന്നതിനുള്ള ശ്രമങ്ങള്‍ അന്വേഷണ സംഘം തുടങ്ങിയിട്ടുണ്ട്. കോടതി രേഖകള്‍ എങ്ങനെ ദിലീപിന് കിട്ടി എന്നാണ് പ്രധാനമായും അന്വേഷിക്കാൻ സാധ്യത.

ദിലീപിന്റെ ഫോണുകള്‍ ശാസ്ത്രീയ പരിശോധനയ്ക്ക് വിധേയമാക്കിയപ്പോഴാണ് വിചാരണയുമായി ബന്ധപ്പെട്ട ചില രേഖകള്‍ അന്വേഷണ സംഘത്തിന് ലഭിച്ചത്. ഫോണിലെ രേഖകള്‍ നശിപ്പിക്കാന്‍ ദിലീപിന് സഹായം നല്‍കിയ സൈബര്‍ വിദഗ്ദ്ധന്‍ സായ് ശങ്കറിന്റെ ഹാര്‍ഡ് ഡിസ്‌ക്കില്‍നിന്നും ഈ രേഖകള്‍ കണ്ടെടുത്തിരുന്നു. ഇതെല്ലാം കോടതിയില്‍നിന്ന് സര്‍ട്ടിഫൈഡ് കോപ്പികളായി ലഭിച്ച രേഖകളല്ലെന്നും ദിലീപ് നിയമവിരുദ്ധമായി സംഘടിപ്പിച്ചവയാണ് ഇതെല്ലാം എന്നുമാണ് അന്വേഷണ സംഘം പറയുന്നത്.

ഇത് സംഘടിപ്പിക്കുന്നതിനായി കോടതിയിലെ ജീവനക്കാരുടെ സഹായം ലഭിച്ചിട്ടുണ്ടെന്നും അന്വേഷണസംഘം വ്യക്തമാക്കുന്നു. ദിലീപിന്റെ കേസ് വാദിച്ച അഭിഭാഷകര്‍ക്കും കോടതി ജീവനക്കാരും തമ്മിലുള്ള ബന്ധം ഇതിനായി ഉപയോഗപ്പെടുത്തിയോ എന്നും പരിശോധിക്കും. ഇതിനുവേണ്ടിയാണ് ജീവനക്കാരെ ചോദ്യം ചെയ്യാനൊരുങ്ങുന്നത്.

Related Articles

Latest Articles