ടെഹ്റാൻ : പശ്ചിമേഷ്യൻ സംഘർഷം രൂക്ഷമായി തുടരുന്നതിനിടെ സമുദ്ര വ്യാപാര മേഖലയിൽ ഇന്ത്യയ്ക്ക് ആശ്വാസകരമായ നീക്കവുമായി ഇറാൻ. ഹോർമുസ് കടലിടുക്കിലൂടെയുള്ള ഇന്ത്യൻ ടാങ്കറുകളുടെ സുരക്ഷിതമായ സഞ്ചാരത്തിന് ഇറാൻ അനുമതി നൽകി. കേന്ദ്ര വിദേശകാര്യ മന്ത്രി ഡോ. എസ്. ജയശങ്കറും ഇറാൻ വിദേശകാര്യ മന്ത്രി അബ്ബാസ് അരാഗ്ചിയും തമ്മിൽ നടത്തിയ നിർണ്ണായകമായ നയതന്ത്ര ചർച്ചകൾക്ക് പിന്നാലെയാണ് ഈ തീരുമാനം. അമേരിക്ക, ഇസ്രായേൽ, യൂറോപ്യൻ രാജ്യങ്ങൾ എന്നിവരുമായി ബന്ധമുള്ള കപ്പലുകൾക്ക് മേഖലയിൽ കർശന നിയന്ത്രണങ്ങൾ നേരിടേണ്ടി വരുമ്പോഴാണ് ഇന്ത്യയുടെ ‘പുഷ്പക്’, ‘പരിമൾ’ എന്നീ ടാങ്കറുകൾക്ക് സുരക്ഷിതമായി കടന്നുപോകാൻ സാധിച്ചത് എന്നത് ശ്രദ്ധേയമാണ്.
കഴിഞ്ഞ ചൊവ്വാഴ്ച രാത്രിയാണ് ഇരു രാജ്യങ്ങളിലെയും വിദേശകാര്യ മന്ത്രിമാർ ഫോണിലൂടെ സുപ്രധാന ചർച്ചകൾ നടത്തിയത്. സംഘർഷം ആരംഭിച്ചതിന് ശേഷം ഇത് മൂന്നാം തവണയാണ് ഇവർ ആശയവിനിമയം നടത്തുന്നത്. ഊർജ്ജ സുരക്ഷയും ചരക്ക് നീക്കവും തടസ്സപ്പെടാതിരിക്കാൻ ഇന്ത്യ നടത്തുന്ന നയതന്ത്ര ഇടപെടലുകളുടെ ഭാഗമായിരുന്നു ഈ നീക്കം. ഇതോടൊപ്പം തന്നെ റഷ്യൻ വിദേശകാര്യ മന്ത്രി സെർജി ലാവ്റോവ്, ഫ്രഞ്ച് വിദേശകാര്യ മന്ത്രി ഷോൺ നോയൽ ബാരോട്ട് എന്നിവരുമായും ഡോ. എസ്. ജയശങ്കർ സ്ഥിതിഗതികൾ ചർച്ച ചെയ്തു. ആഗോള ഊർജ്ജ വിപണിയെ സംഘർഷം ബാധിക്കാതിരിക്കാൻ എല്ലാ രാജ്യങ്ങളും ഒത്തൊരുമിച്ച് പ്രവർത്തിക്കേണ്ടതിന്റെ ആവശ്യകത അദ്ദേഹം ചർച്ചകളിൽ ഊന്നിപ്പറഞ്ഞു.
ഇന്ത്യൻ കപ്പലുകൾക്ക് ഇളവ് ലഭിക്കുമ്പോഴും മേഖലയിലെ സുരക്ഷാ ഭീഷണി ഒഴിയുന്നില്ല എന്നതിന്റെ തെളിവായി തായ്ലൻഡ് കപ്പലിന് നേരെയുള്ള ആക്രമണം മാറി. യു.എ.ഇയിൽ നിന്ന് ഗുജറാത്തിലെ കണ്ട്ല തുറമുഖത്തേക്ക് വരികയായിരുന്ന ‘മയൂരി നാരി’ എന്ന ചരക്ക് കപ്പലിന് നേരെ ഹോർമുസ് കടലിടുക്കിൽ വെച്ച് ആക്രമണമുണ്ടായി. അജ്ഞാത കേന്ദ്രത്തിൽ നിന്നുള്ള മിസൈൽ ആക്രമണത്തിൽ കപ്പലിൽ തീപിടുത്തമുണ്ടായെങ്കിലും അടിയന്തര രക്ഷാപ്രവർത്തനം നടത്തി നാശനഷ്ടങ്ങൾ കുറയ്ക്കാൻ സാധിച്ചു. സിവിലിയൻ കപ്പലുകളെ ലക്ഷ്യം വെച്ചുള്ള ഇത്തരം സൈനിക നീക്കങ്ങൾ അപകടകരമാണെന്നും ഇത് സംഘർഷം പുതിയ തലങ്ങളിലേക്ക് എത്തിക്കുമെന്നും ഇന്ത്യൻ വിദേശകാര്യ മന്ത്രാലയം പ്രസ്താവനയിലൂടെ അപലപിച്ചു.

