എറണാകുളം: ആലുവയിൽ എട്ടുവയസുകാരിയെ തട്ടിക്കൊണ്ടുപോയി പീഡിപ്പിച്ച പ്രതി ക്രിസ്റ്റിലിനെ പിടികൂടിയത് അതിസാഹസികമായി. പോലീസ് തന്നെ പിന്തുടരുന്നു എന്നറിഞ്ഞ പ്രതി പിടിക്കപ്പെടാതിരിക്കാൻ വേഷവും രൂപവും മാറി. ഫോൺ സ്വിച്ച് ഓഫ് ചെയ്ത് ഉപേക്ഷിച്ചു. ഒടിവിൽ പിടിയിലാകും എന്നായതോടെ ആലുവയിലെ മാർത്താണ്ഡവർമ്മ പാലത്തിന് താഴെ ഒളിക്കുകയായിരുന്നു.
പോലീസ് കണ്ടെത്തുമ്പോൾ ക്രിസ്റ്റിൽ പാലത്തിന്റെ അടിയിൽ കുറ്റിക്കാട്ടിൽ ഒളിച്ചിരിക്കുകയായിരുന്നു. നാട്ടുകാരെയും പോലീസിനെയും കണ്ടതോടെ പുഴയിലേക്ക് ചാടി.
എന്നാൽ നാട്ടുകാരുടെ സഹായത്തോടെ പോലീസ് പ്രതിയെ അതിസാഹസികമായി കീഴ്‌പ്പെടുത്തുകയായിരുന്നു. പിടികൂടുമ്പോൾ പ്രതി മദ്യപിച്ചിട്ടുണ്ടായിരുന്നതായി പോലീസ് പറയുന്നു. രാവിലെ സംഭവത്തിന് പിന്നാലെ തന്നെ പ്രതിയെ കുറിച്ച് നിർണായക വിവരങ്ങൾ പോലീസിന് ലഭിച്ചിരുന്നു. എന്നാൽ സിസിടിവി ദൃശ്യം ലഭിച്ചതാണ് കേസിൽ നിർണായകമായത്. സിസിടിവി ദൃശ്യങ്ങളിൽ ഉള്ളത് പ്രതിയാണെന്ന് സാക്ഷിയായ നാട്ടുകാരനും പെൺകുട്ടിയും തിരിച്ചറിഞ്ഞു. പിന്നാലെ പോലീസ് പ്രതിയുടെ വിവരങ്ങൾ ശേഖരിക്കുകയായിരുന്നു.
മുൻപും നിരവധി കേസികളിൽ പ്രതിയായിട്ടുള്ള ആളാണ് തിരുവനന്തപുരം ചെങ്കൽ സ്വദേശി ക്രിസ്റ്റിൽ. ഇയാൾ പെരുമ്പാവൂരിലെ ഒരു മോഷണക്കേസിൽ ശിക്ഷ അനുഭവിച്ച ശേഷം ആഗസ്റ്റ് 10നാണ് വിയ്യൂർ ജയിലിൽ നിന്നും പുറത്തിറങ്ങിയത്.
