ദില്ലി: ഇന്ത്യയുടെ പുതിയ രാഷ്ട്രപതി ദ്രൗപതി മുര്‍മു തന്നെയാണെന്ന് ഉറപ്പിച്ചിരിക്കുമ്പോൾ പുതു ചരിത്രം തന്നെയാണ് രചിക്കപ്പെടുന്നത്. ഇന്ത്യൻ രാഷ്ട്രപതിയാകുമ്പോൾ മുർമുവിനെ തേടിയെത്തുന്നത് നിരവധി സൗകാര്യങ്ങളാണ്. ഇനി മുതല്‍ ഓരോ മാസവും ലക്ഷങ്ങളാണ് മുര്‍മുവിന് ശമ്പളമായി ലഭിക്കുന്നത്.
രാഷ്ട്രപതിയുടെ ശമ്പളം അഞ്ച് ലക്ഷം രൂപയാണ്. ശമ്പളത്തിന് പുറമെ രാഷ്ട്രപതിക്ക് മറ്റു ആനുകൂല്യങ്ങളും സൗകര്യങ്ങളും രാജ്യം നല്‍കുന്നുണ്ട്. താമസത്തിന് പുറമേ ആജീവാനന്ത ചികിത്സാ സൗകര്യങ്ങളെല്ലാം ലഭ്യമാക്കുന്നുണ്ട്.
രാജ്യത്തിന് അകത്തും പുറത്തും ഏറ്റവുമധികം സുരക്ഷ ലഭിക്കുന്ന വ്യക്തിയെന്ന നിലയില്‍ രാഷ്ട്രപതിക്ക് സഞ്ചരിക്കാനായി നല്‍കുന്നത് മെഴ്സിഡസ് ബെന്‍സ് എസ് 600 പുള്‍മാന്‍ ഗാര്‍ഡാണ്. ഇതുകൂടാതെ ഔദ്യോഗിക ആവശ്യങ്ങള്‍ക്ക് ലിമോസിന്‍ കാറും ഉപയോഗിക്കാം.
ഇന്ത്യന്‍ രാഷ്ട്രപതിയുടെ ഔദ്യോഗിക വസതിയായ ദില്ലിയിലെ രാഷ്ട്രപതി ഭവനിലാണ് മുർമുവിന്റെ ഇനിയുള്ള താമസം. ഇതുകൂടാതെ, രാഷ്ട്രപതിയുടെ താമസത്തിനും അതിഥികളെ സ്വീകരിക്കാനുമായി ഓരോ വര്‍ഷവും 2.25 കോടി രൂപയോളം കേന്ദ്രസര്‍ക്കാര്‍ ചെലവഴിക്കുന്നുണ്ട്.
