തിരുവനന്തപുരം : വീട്ടുമുറ്റത്ത് അതീവ രഹസ്യമായി കഞ്ചാവ് ചെടികൾ നട്ടുവളർത്തി പരിപാലിച്ചുപോന്ന യുവാവിനെ എക്സൈസ് സംഘം അറസ്റ്റ് ചെയ്തു. പൊഴിയൂരിന് സമീപം പുല്ലുവേറ്റി സ്വദേശി അലക്സിന്റെ മകൻ അജിൻ (29) ആണ് എക്സൈസ് ഉദ്യോഗസ്ഥരുടെ പിടിയിലായത്. രഹസ്യ വിവരത്തിന്റെ അടിസ്ഥാനത്തിൽ പ്രതിയുടെ വീട്ടിൽ നടത്തിയ പരിശോധനയിലാണ് വീട്ടുമുറ്റത്ത് വളർത്തിയിരുന്ന കഞ്ചാവ് ചെടികൾ കണ്ടെടുത്തത്.
വീട്ടുമുറ്റത്ത് കഞ്ചാവ് ചെടികൾ നട്ടുവളർത്തി; പൊഴിയൂരിൽ യുവാവ് എക്സൈസ് പിടിയിൽ pic.twitter.com/KEg4TkWTEQ
— Tatwamayi News (@TatwamayiNews) May 29, 2026
പ്രദേശത്ത് ലഹരിമരുന്ന് വിപണനവും ഉപയോഗവും വർദ്ധിച്ചുവരുന്നതായി എക്സൈസ് ഇന്റലിജൻസിന് നേരത്തെ തന്നെ സൂചനകൾ ലഭിച്ചിരുന്നു. ഇതിന്റെ അടിസ്ഥാനത്തിൽ നിരീക്ഷണം ശക്തമാക്കിയ ഉദ്യോഗസ്ഥർ, പ്രതിയുടെ വീട്ടുവളപ്പിൽ സംശയസ്പദമായ രീതിയിൽ ചെടികൾ വളർത്തുന്നതായി കണ്ടെത്തുകയായിരുന്നു. വീട്ടുമുറ്റത്തെ മറ്റ് ചെടികൾക്കിടയിലാണ് കഞ്ചാവ് ചെടികൾ നട്ടുനനച്ച് വളർത്തിയിരുന്നത്. പിടിച്ചെടുത്ത കഞ്ചാവ് ചെടികൾ കോടതിയിൽ ഹാജരാക്കുമെന്നും പ്രതിക്ക് ലഹരിമരുന്ന് മാഫിയകളുമായി എന്തെങ്കിലും തരത്തിലുള്ള ബന്ധമുണ്ടോ എന്നതിനെക്കുറിച്ച് വിശദമായ അന്വേഷണം ആരംഭിച്ചിട്ടുണ്ടെന്നും എക്സൈസ് അധികൃതർ വ്യക്തമാക്കി. ലഹരി വിരുദ്ധ പരിശോധനകൾ വരും ദിവസങ്ങളിലും കർശനമായി തുടരുമെന്ന് എക്സൈസ് സംഘം അറിയിച്ചു.
