റിയാദ്: റിയാദിലെ അന്താരാഷ്ട്ര വിമാനത്താവളത്തിലെ പാസഞ്ചര്‍ ടെര്‍മിനലിന് നേരെ ഹൂതികളുടെ പുതിയ വ്യോമാക്രമണം. ഒരു ഇന്ത്യക്കാരന്‍ ഉള്‍പ്പെടെ 13 പേരുടെ മരണത്തിനിടയാക്കിയ യെമന്‍ ഗ്രൂപ്പിന്റെ ഭീകരാക്രമണത്തിന് തൊട്ടടുത്ത ദിവസമാണ് പുതിയ ആക്രമണമുണ്ടായിരിക്കുന്നത്. റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിലെ നാലാം ടെര്‍മിനലില്‍ അജ്ഞാത മിസൈല്‍ പതിച്ച് തീപിടുത്തമുണ്ടാവുകയും, ഒരാള്‍ കൊല്ലപ്പെടുകയും 11 പേര്‍ക്ക് പരിക്കേല്‍ക്കുകയും ചെയ്തതായി സൗദി സിവില്‍ ഏവിയേഷന്‍ അധികൃതര്‍ അറിയിച്ചു.
കഴിഞ്ഞ ആഴ്ച വിമാനത്താവളത്തിന് നേരെ നടന്ന നിരവധി ആക്രമണങ്ങളുടെ തുടര്‍ച്ചയായി, വിമാനത്താവളത്തിന് സമീപം ഒരു ക്രൂയിസ് മിസൈലും സൗദി വ്യോമ പ്രതിരോധ സേന തടഞ്ഞു. തുടര്‍ച്ചയായുള്ള ഈ ആക്രമണങ്ങളെ തുടര്‍ന്ന് റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിലെ പ്രവര്‍ത്തനങ്ങള്‍ നിര്‍ത്തിവയ്ക്കാന്‍ അധികാരികള്‍ നിര്‍ബന്ധിതരായി. കഴിഞ്ഞ അഞ്ച് ദിവസത്തിനിടെ നാലാം തവണയാണ് വിമാനത്താവളത്തിന് നേരെ ആക്രമണമുണ്ടാകുന്നത്. ഇറാന്‍ യുദ്ധം ആരംഭിച്ചതിനുശേഷമുള്ള സൗദി മണ്ണിലെ ഏറ്റവും വലിയ ആക്രമണങ്ങളിലൊന്നാണിത്. ഈ ആക്രമണത്തില്‍ മുന്നൂറിലധികം ആളുകള്‍ക്ക് പരിക്കേറ്റിട്ടുണ്ട്, ചിലരുടെ നില ഗുരുതരമാണ്.
വിമാനങ്ങളില്‍ കയറാന്‍ തയ്യാറെടുത്തിരുന്ന ഉംറ തീര്‍ത്ഥാടകര്‍ ഉള്‍പ്പെടെയുള്ളവര്‍ ഉണ്ടായിരുന്ന വിമാനത്താവളത്തില്‍ ആക്രമണം നടക്കുന്നതിന്റെ ദൃശ്യങ്ങള്‍ സമൂഹമാധ്യമങ്ങളില്‍ പുറത്തുവന്നിട്ടുണ്ട്. വിവിധ കോണുകളില്‍ നിന്നുള്ള സിസിടിവി ദൃശ്യങ്ങളില്‍ യാത്രക്കാര്‍ വിമാനത്തിനായി കാത്തുനില്‍ക്കുമ്പോള്‍ പെട്ടെന്ന് ശക്തമായ ഓറഞ്ച് വെളിച്ചം വരുന്നതും, ആളുകള്‍ ജീവനുവേണ്ടി ഓടാന്‍ ശ്രമിക്കുന്നതും കാണാം. സ്‌ഫോടനത്തില്‍ വിമാനത്താവളത്തിന്റെ മേല്‍ക്കൂരയുടെ ചില ഭാഗങ്ങള്‍ തകര്‍ന്നു വീഴുന്നതും ദൃശ്യങ്ങളിലുണ്ട്.
കഴിഞ്ഞ 24 മണിക്കൂറിനിടെ കിഴക്കന്‍ മേഖലയിലെ ദമാം വിമാനത്താവളത്തിലുള്‍പ്പെടെ നിരവധി ആക്രമണങ്ങള്‍ നടത്തിയതായി ഇറാന്‍ പിന്തുണയുള്ള ഹൂതി സംഘടന അവകാശപ്പെട്ടിട്ടുണ്ട്. രാജ്യത്തെ യാത്രാ കേന്ദ്രങ്ങള്‍ തങ്ങളുടെ ‘സൈനിക നീക്കങ്ങളുടെ വേദി’യാണെന്ന് വിശേഷിപ്പിച്ച അവര്‍, സൗദിയിലെ വിമാനത്താവളങ്ങള്‍ ലക്ഷ്യമിടുന്നത് തുടരുമെന്നും ഭീഷണിപ്പെടുത്തി.
ഈ ആക്രമണത്തെ ‘പൂര്‍ണ്ണമായ യുദ്ധക്കുറ്റം’ എന്ന് വിശേഷിപ്പിച്ച ഹൂതി വിരുദ്ധ സഖ്യം ശക്തമായി തിരിച്ചടിക്കുമെന്ന് പ്രതിജ്ഞയെടുത്തു. സൗദി വ്യോമാത്രുതിയുടെ ഉപയോഗത്തെച്ചൊല്ലി ഹൂതികള്‍ മുന്നറിയിപ്പ് നല്‍കിയതിനെത്തുടര്‍ന്ന്, സംഘര്‍ഷാവസ്ഥ കണക്കിലെടുത്ത് നിരവധി വിമാനക്കമ്പനികള്‍ സൗദിയിലേക്കുള്ള സര്‍വീസുകള്‍ നിര്‍ത്തിവച്ചു. ഇന്ത്യ ഉള്‍പ്പെടെയുള്ള ചില എംബസികള്‍ വിമാനത്താവളങ്ങള്‍ ഉപയോഗിക്കുന്നതിലെ അപകടങ്ങളെക്കുറിച്ച് തങ്ങളുടെ പൗരന്മാര്‍ക്ക് മുന്നറിയിപ്പ് നല്‍കിയിട്ടുണ്ട്.
യെമന്‍ തലസ്ഥാനമായ സനായിലെ വിമതരുടെ നിയന്ത്രണത്തിലുള്ള വിമാനത്താവളത്തിന് നേരെ വീണ്ടും ആക്രമണം നടന്നുവെന്നും ഇതിന് പിന്നില്‍ സൗദിയാണെന്നും ഹൂതികള്‍ ആരോപിച്ചതിന് തൊട്ടുപിന്നാലെയാണ് റിയാദിലെ പുതിയ ആക്രമണം. ഞായറാഴ്ച രാത്രി ഹൂതികളുടെ ഉടമസ്ഥതയിലുള്ള അല്‍-മസിറ ടിവി ചാനല്‍ സനായില്‍ കൂടുതല്‍ വ്യോമാക്രമണങ്ങള്‍ നടന്നതായി റിപ്പോര്‍ട്ട് ചെയ്യുകയും സൗദി അറേബ്യയെ കുറ്റപ്പെടുത്തുകയും ചെയ്തു. എന്നാല്‍ ഈ ആക്രമണങ്ങളെക്കുറിച്ച് സൗദി അറേബ്യ പ്രതികരിച്ചിട്ടില്ല.
വര്‍ഷങ്ങളായി സൈന്യത്തിനായി കോടിക്കണക്കിന് ഡോളര്‍ സൗദി അറേബ്യ ചെലവഴിക്കുന്നുണ്ടെങ്കിലും ഹൂതികളുടെ ആക്രമണങ്ങള്‍ തടയാന്‍ കഴിയുന്നില്ല. യെമന്‍ യുദ്ധത്തില്‍ രാജ്യാന്തര അംഗീകാരമുള്ള സര്‍ക്കാരിന് റിയാദ് ദീര്‍ഘകാലമായി നല്‍കിവരുന്ന സൈനിക പിന്തുണയുടെ പശ്ചാത്തലത്തില്‍ ഈ ആക്രമണങ്ങള്‍ പുതിയൊരു വഴിതിരിവായി മാറിയിരിക്കുകയാണ്. ഹൂതികള്‍ക്കെതിരായ പോരാട്ടത്തില്‍ അമേരിക്കന്‍ പങ്കാളിത്തം പരിഗണിക്കുന്നുണ്ടെന്ന് യുഎസ് പ്രസിഡന്റ് ഡൊണാള്‍ഡ് ട്രംപ് വ്യക്തമാക്കിയതോടെ ഈ പുതിയ സംഘര്‍ഷം കൂടുതല്‍ വലിയ യുഎസ് സൈനിക ഇടപെടലിലേക്ക് നയിച്ചേക്കുമെന്ന ആശങ്കയും ഉയര്‍ന്നു വരുന്നുണ്ട്.
ആഗോള എണ്ണ വിപണിയും വിലയും, ഹോര്‍മുസ് കടലിടുക്കിന് പകരമുള്ള നിര്‍ണായക സമുദ്രപാതയിലെ വാണിജ്യ കപ്പല്‍ ഗതാഗതവും, മേഖലയിലെ സാധാരണക്കാരുടെയും വ്യോമയാനത്തിന്റെയും സുരക്ഷയുമാണ് ഈ യുദ്ധത്തില്‍ അപകടത്തിലായിരിക്കുന്നത്.
