ഗുരുവായൂര്: ഗുരുവായൂർ ക്ഷേത്രത്തിൽ ബോംബുണ്ടെന്ന് വ്യാജ ഭീഷണി നൽകിയ യുവാവ് അറസ്റ്റിൽ. നെന്മിനിയില് വാടകക്ക് താമസിക്കുന്ന തൃശൂര് പുല്ലഴി കോഴിപറമ്പില് സജീവനെയാണ് ടെമ്പൾ പൊലീസ് പിടികൂടിയത്.
ശനിയാഴ്ച രാത്രി 9.30ഓടെയാണ് പൊലീസ് കണ്ട്രോള് റൂമിലേക്ക് വിളി വന്നത്. ഉടന് ക്ഷേത്രത്തില് ഉണ്ടായിരുന്ന ഭക്തരെ പുറത്താക്കി പരിശോധനയും നടത്തി. സന്ദേശം വ്യാജമെന്ന് കണ്ടെത്തിയതോടെ വിളിച്ച ആളുടെ നമ്പര് കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ മമ്മിയൂരില്നിന്ന് പിടികൂടിയത്.
മദ്യലഹരിയില് വിളിച്ചതാണെന്നാണ് പ്രതി പൊലീസിനോട് പറഞ്ഞത്. നേരത്തേയും പ്രതി സമാന രീതിയില് ഭീഷണി മുഴക്കിയതായും കലക്ടറേറ്റില് ബോംബ് വെച്ചിട്ടുണ്ടെന്ന് വ്യാജ സന്ദേശം നല്കിയതിന് ഇയാള്ക്കെതിരെ തൃശൂര് വെസ്റ്റ് പൊലീസ് സ്റ്റേഷനില് കേസുണ്ടെന്നും പൊലീസ് അറിയിച്ചു. ഇയാളെ റിമാന്ഡ് ചെയ്തു.