തിരുവനന്തപുരം: സംസ്ഥാനത്ത് ഇന്ന് മഴയ്ക്ക് നേരിയ ശമനമുണ്ടെങ്കിലും തുടർന്നുള്ള ദിവസങ്ങളിലും മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. മധ്യപടിഞ്ഞാറൻ ബംഗാൾ ഉൾകടലിൽ ആന്ധ്രാ പ്രദേശ് തീരത്തിനു മുകളിൽ ചക്രവാതചുഴി നിലനിൽക്കുന്നതിന് പുറമേമധ്യ കർണാടകക്ക് മുകളിൽ മറ്റൊരു ചക്രവാതചുഴി കൂടി സ്ഥിതി ചെയ്യുന്നതാണ് മഴ ഭീഷണി തുടരാൻ കാരണം.
ഇന്ന് മുതല് ആഗസ്റ്റ് ഒമ്പത് വരെ മധ്യ കിഴക്കന് അറബിക്കടലിലും ആഗസ്റ്റ് ഒമ്പതിന് വടക്ക് കിഴക്കന് അറബിക്കടലിലും 40 മുതല് 50 കിലോമീറ്റര് വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്. ഇന്ന് മുതല് ആഗസ്റ്റ് ഒമ്പത് വരെ ഗള്ഫ് ഓഫ് മാന്നാറില് 50 മുതല് 60 കിലോമീറ്റര് വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്നും മുന്നറിയിപ്പില് പറയുന്നു.
ഈ സാഹചര്യത്തില് കേരള-ലക്ഷദ്വീപ് തീരങ്ങളില് ഇന്നും (ആഗസ്റ്റ് അഞ്ച്), ആഗസ്റ്റ് എട്ട്, ഒമ്പത് തീയതികളിലും കര്ണാടക തീരങ്ങളില് ഇന്നും നാളെയും ആഗസ്റ്റ് എട്ട് , ഒമ്പത് തീയതികളിലും മുന്നറിയിപ്പുള്ള മറ്റ് സ്ഥലങ്ങളില് ഈ ദിവസങ്ങളിലും മത്സ്യത്തൊഴിലാളികള് മത്സ്യബന്ധനത്തിന് പോകരുതെന്ന് ജില്ലാ കളക്ടര് ജെറോമിക് ജോര്ജ് അറിയിച്ചു.