ഉയർന്ന പലിശയും നിക്ഷേപ സുരക്ഷയും ആഗ്രഹിക്കുന്നവരെ ലക്ഷ്യമിട്ട് പുതിയ നിക്ഷേപ പദ്ധതി, സ്റ്റേറ്റ് ബാങ്ക് ഓഫ് ഇന്ത്യ അവതരിപ്പിച്ചു. ‘അമൃതകലശ്’ എന്ന പേരിലാണ് സ്ഥിരനിക്ഷേപ പദ്ധതി ഉപഭോക്താക്കൾക്കായി ബാങ്ക് അവതരിപ്പിച്ചിരിക്കുന്നത്.
അമൃതകലശ് നിക്ഷേപ പദ്ധതി
കുറഞ്ഞകാലത്തിനു ഉയർന്ന നിക്ഷേപ പലിശയെന്നതാണ് ഈ നിക്ഷേപ പദ്ധതിയുടെ സവിശേഷത. 400 ദിവസം കാലാവധിയുള്ള പദ്ധതിയിലൂടെ പൊതു നിക്ഷേപകർക്ക് 7.10 ശതമാനവും മുതിർന്ന പൗരന്മാർക്ക് 7.60% പലിശ നിരക്കുമാണ് ബാങ്ക് വാഗ്ദാനം ചെയ്യുന്നത്. എസ്.ബി.ഐ ജീവനക്കാർക്കും പെൻഷൻകാർക്കും മുതിർന്ന പൗരന്മാർക്ക് വാഗ്ദാനം ചെയ്തിരിക്കുന്ന പലിശ നിരക്ക് ലഭിക്കും. ഈ മാസം 31 വരെയാണ് പദ്ധതിയിൽ ചേരാനുള്ള അവസരം. പ്രതിമാസമോ പാദവാർഷികമോ അർദ്ധവാർഷികമോ ആയി പലിശ ലഭിക്കും. കാലാവധി എത്തുന്നതിനു മുമ്പ് നിബന്ധനകളോടെ നിക്ഷേപം പിൻവലിക്കാനുള്ള സൗകര്യവുമുണ്ട്. പ്രവാസികൾക്കും പദ്ധതിയിൽ നിക്ഷേപകരാകാം. നിക്ഷേപത്തിൽ നിന്ന് വായ്പയെടുക്കാനുള്ള സൗകര്യവും ഉണ്ട്.
ആർ ബി ഐ റിപ്പോ നിരക്ക് വർദ്ധിപ്പിച്ചതിനെ തുടർന്ന് എസ്ബിഐ നിക്ഷേപപദ്ധതികളിലെ പലിശ നിരക്കുകൾ വർദ്ധിപ്പിച്ചിട്ടുണ്ട്. രണ്ടു വർഷം മുതൽ 10 വർഷം വരെയുള്ള സ്ഥിര നിക്ഷേപങ്ങളുടെ പലിശ നിരക്ക് അര ശതമാനം കൂട്ടി. 2 വർഷം മുതൽ 3 വർഷം വരെ 7% വും 3 വർഷം മുതൽ 10 വർഷം വരെ 6.5 % വുമാണ് പുതിയ പലിശ നിരക്ക്. മുതിർന്ന പൗരന്മാർക്ക് അര ശതമാനം അധിക പലിശ ലഭിക്കും.