ദില്ലി: ദില്ലി – വഡോദര സർവ്വീസ് നടത്തുന്ന ഇൻഡിഗോ വിമാനത്തിൽ സാങ്കേതിക തകരാർ. ഇൻഡിഗോയുടെ 6ഇ-859 വിമാനത്തിന്റെ എൻജിനിലാണ് തകരാർ കണ്ടെത്തിയത്. തുടർന്ന് വിമാനം ജയ്പൂരിലേക്ക് തിരിച്ചു വിടുകയായിരുന്നുവെന്ന് ഡയറക്ട്രറേറ്റ് ജനറൽ ഓഫ് സിവിൽ ഏവിയേഷൻ വ്യക്തമാക്കി. ഗുജറാത്തിലേക്കുള്ള യാത്രയിലാണ് വിമാനത്തിൽ സാങ്കേതിക തകരാർ കണ്ടെത്തിയത്.
ദില്ലിയിൽ നിന്ന് വ്യാഴാഴ്ച വൈകിട്ട് യാത്ര പുറപ്പെട്ട വിമാനത്തിന്റെ എൻജിനിൽ പ്രകമ്പനങ്ങൾ അനുഭവപ്പെട്ടതോടെയാണ് രാത്രി വൈകി ജയ്പൂരിലേക്ക് വഴി തിരിച്ച് വിട്ടത്. വിമാനത്തിലെ യാത്രക്കാർ സുരക്ഷിതരാണെന്നും സംഭവത്തിൽ അന്വേഷണത്തിന് ഉത്തരവിട്ടതായും ഉദ്യോഗസ്ഥർ അറിയിച്ചു.
കഴിഞ്ഞ കുറച്ച് മാസങ്ങളിലായി നിരവധി തവണയാണ് അടയന്തിരമായി സ്‌പൈസ്‌ജെറ്റ് വിമാനങ്ങൾ തകരാറുകൾ കാരണമിറക്കിയത്. ഇതിന് പിന്നാലെയാണ് ഇൻഡിഗോ വിമാനത്തിലും തകരാർ.
