കൊച്ചി : കേരള ബ്ലാസ്റ്റേഴ്സിന്റെ കണ്ടെത്തലായ മലയാളി സൂപ്പർ താരം സഹൽ അബ്ദുൽ സമദിനെ ടീമിലെത്തിക്കാൻ ശ്രമം തുടങ്ങി മറ്റു ഐഎസ്എൽ ക്ലബ്ബുകൾ. കൊൽക്കത്ത മോഹൻ ബഗാൻ സൂപ്പർ ജയന്റ്സ്, ഒഡീഷ എഫ്സിതുടങ്ങിയ ക്ലബുകൾ ഇതിനോടകം സഹലിനായി രംഗത്തുണ്ടെന്നാണ് വിവരം. ഒഡീഷ കോച്ചായി ചുമതലയേറ്റ സെർജിയോ ലൊബേറോയ്ക്ക് സഹലിൽ വലിയ താല്പര്യമുണ്ട്. അതെ സമയം നിലവിൽ 2025 വരെ ബ്ലാസ്റ്റേഴ്സുമായി കരാറുള്ള സഹലിനു നേരത്തേ ക്ലബ് വിടണമെങ്കിൽ റിലീസ് ക്ലോസ് ആയി 12 കോടി രൂപ വാങ്ങുന്ന ക്ലബ് ചെലവാക്കേണ്ടിവരും. ഇത്രയും ഉയർന്ന തുക മുടക്കാൻ ഒരു ക്ലബ് തയാറാവുകയും സഹൽ ഇതിനു അനുകൂലമായി തീരുമാനം എടുത്താൽ മാത്രമേ സഹലിന്റെ ടീം മാറ്റം നടക്കൂ.
അതേസമയം കഴിഞ്ഞ സീസണിലെ സൂപ്പർ സബ് യുക്രെയ്ൻ താരം ഇവാൻ കല്യൂഷ്നി ടീം വിട്ടേക്കും. വായ്പക്കരാറിൽ ടീമിലെത്തിയ കല്യൂഷ്നി ഐഎസ്എലിൽ 4 മത്സരം കളിച്ചു; 7 ഗോളും നേടി. സൂപ്പർ കപ്പ് പൂർത്തിയാകും മുൻപേ താരം ടീം ക്യാംപ് വിട്ടു. ബ്ലാസ്റ്റേഴ്സിൽ താരം മടങ്ങിവരാൻ സാധ്യത കുറവാണെന്നാണു വിവരം. നേരത്തെ മറ്റൊരു താരം അപ്പോസ്തലസ് ജിയാനുവും ടീം വിട്ടിരുന്നു.