മയക്കുമരുന്ന് കേസില് അറസ്റ്റിലായ ബോളിവുഡ് സൂപ്പര്സ്റ്റാര് ഷാരൂഖ് ഖാന്റെ മകന് ആര്യന് ഖാന് പൂർണ്ണ പിന്തുണയറിയിച്ച് തുറന്ന കത്തെഴുതി രംഗത്ത് എത്തിയ നടന് ഹൃത്വിക് റോഷനെ(Hrithik Roshan) പരിഹാസിച്ച് കങ്കണ റണാവത്ത്(Kangana Ranaut). ആര്യൻ അറസ്റ്റിലായ സംഭവത്തിൽ പ്രതികരിക്കുന്ന ബോളിവുഡ് സിനിമാപ്രവര്ത്തകര്ക്കെതിരേയാണ് കങ്കണയുടെ പ്രതികരണം.
“എല്ലാ മാഫിയ പപ്പുകളും ആര്യന് പിന്തുണയുമായി വന്നിട്ടുണ്ട്. എല്ലാവരും തെറ്റും ചെയ്യാറുണ്ട്. എന്നാൽ തെറ്റിനെ ഒരിക്കലും മഹത്വവൽക്കരിക്കരുതെന്ന് നടി പറയുന്നു. കൂടാതെ നമ്മുടെ കര്മങ്ങള് സൃഷ്ടിക്കുന്ന പ്രത്യഘാതം എന്താണെന്ന് തിരിച്ചറിയാന് ഈ നടപടി ആര്യനെ സഹായിക്കുമെന്ന് വിശ്വസിക്കുന്നെന്നും, കുറച്ച് കൂടി നല്ല വ്യക്തിയായി പരിണമിക്കാന് ആര്യന് സാധിക്കട്ടെന്നും കങ്കണ പറയുന്നു. ദുര്ബലനായി ഇരിക്കുന്ന ഒരാളെക്കുറിച്ച് അപവാദങ്ങള് പ്രചരിപ്പിക്കരുത്. എന്നാല് ഇവിടെ ഈ കുറ്റവാളികള് അയാള് ചെയ്തതില് യാതൊരു തെറ്റുമില്ലെന്ന് തോന്നിപ്പിക്കുന്ന തരത്തില് പിന്തുണയ്ക്കുന്നെന്നും കങ്കണ കൂട്ടിച്ചേർത്തു.
അതേസമയം ഇപ്പോഴത്തെ പ്രതിസന്ധികള് നല്ല ഭാവിയിലേക്കുള്ള വഴിവിളക്കുകളാകുമെന്നും മോശം അനുഭവങ്ങളെയും തള്ളിക്കളയാതെ സ്വീകരിക്കാന് ശ്രമിക്കാനുമാണ് ഹൃത്വിക് കത്തില് പറയുന്നത്. തന്റെ ഇന്സ്റ്റഗ്രാം അക്കൗണ്ടിലൂടെയാണ് ഹൃത്വിക് ആര്യനുള്ള തന്റെ കത്ത് എഴുതിയിരിക്കുന്നത്.