ഫറ്റോര്‍ഡ: നോർത്ത്‌ ഈസ്റ്റ് യുണൈറ്റഡിനെ 2–1ന്‌ തകർത്ത് ഐഎസ്‌എലിൽ (ISL) കേരള ബ്ലാസ്‌റ്റേഴ്‌സിന്റെ അതിമനോഹര തിരിച്ചുവരവ്‌. 70-ാം മിനിറ്റില്‍ മത്സരത്തിലെ രണ്ടാം മഞ്ഞക്കാര്‍ഡ് കണ്ട് ആയുഷ് അധികാരി പുറത്തായ ശേഷം ശേഷിച്ച സമയം 10 പേരുമായി കളിച്ചാണ് ബ്ലാസ്റ്റേഴ്സ് ജയം പിടിച്ചത്. ആധികാരിക വിജയത്തോടെ ബ്ലാസ്റ്റേഴ്സ് പോയിന്റ് പട്ടികയില്‍ രണ്ടാമതെത്തി.
62-ാം മിനിറ്റില്‍ പെരേര ഡിയാസിന്റെ ഗോളില്‍ മുന്നിലെത്തിയ ബ്ലാസ്റ്റേഴ്സ് 82-ാം മിനിറ്റില്‍ അല്‍വാരോ വാസ്‌ക്വസിന്റെ തകര്‍പ്പന്‍ ഗോളില്‍ വിജയം സ്വന്തമാക്കുകയായിരുന്നു. ഇന്‍ജുറി ടൈമിന്റെ അവസാന മിനിറ്റില്‍ മുഹമ്മദ് ഇര്‍ഷാദിലൂടെ നോര്‍ത്ത് ഈസ്റ്റ് ആശ്വാസ ഗോള്‍ കണ്ടെത്തി. തോല്‍വി അറിയാത്ത 10 മത്സരങ്ങള്‍ക്ക് ശേഷമെത്തിയ കൊവിഡില്‍ കൊമ്പന്മാര്‍ ബംഗളുരുവിനെതിരായ ഒറ്റഗോളിന് തോറ്റ ശേഷമാണ് തിരിച്ചെത്തിയത്.
ജയത്തോടെ 13 മത്സരങ്ങളില്‍ നിന്ന് 23 പോയിന്റുമായി ബ്ലാസ്റ്റേഴ്സ് രണ്ടാം സ്ഥാനത്തേക്കുയര്‍ന്നു. 14 മത്സരത്തില്‍ നിന്ന് 26 പോയിന്റുള്ള ഹൈദരാബാദാണ് തലപ്പത്ത്. 16 മത്സരത്തില്‍ നിന്ന് 10 പോയിന്റുള്ള നോര്‍ത്ത് ഈസ്റ്റ് അവസാന സ്ഥാനത്താണ്. ഈ മാസം പത്തിന്‌ ജംഷഡ്‌പൂർ എഫ്‌സിയുമായാണ്‌ ബ്ലാസ്റ്റേഴ്സിൻ്റെ അടുത്ത മത്സരം.
