കൊച്ചി: കിഴക്കമ്പലത്ത് പോലീസിനെ ആക്രമിച്ച സംഭവവുമായി ബന്ധപ്പെട്ട കേസില് ഫൊറന്സിക് പരിശോധനാ ഫലം ഇന്ന് ലഭിച്ചേക്കും. കേസില് ഇനിയും പിടിയിലാകാനുള്ളവര്ക്കായി കൂടുതല് പരിശോധനകള് നടത്തും.
സംഭവത്തില് എന്തെങ്കിലും രാസവസ്തുക്കള് ഉപയോഗിച്ചിട്ടുണ്ടോ എന്നാണ് പ്രധാനമായും അറിയേണ്ടത്. സിസിടിവി, മൊബൈല് ദൃശ്യങ്ങള് തുടങ്ങിയവ കേന്ദ്രീകരിച്ചാണ് പ്രധാനമായും പരിശോധന. സംഘര്ഷത്തില് ഉള്പ്പെട്ട ഒരു ഝാര്ഖണ്ഡ് സ്വദേശി രക്ഷപെട്ടതായി കിറ്റക്സ് വ്യക്തമാക്കിയിട്ടുണ്ട്. ഇയാള്ക്കായും തിരച്ചില് നടത്തും. അതേസമയം കേസില് പ്രധാന പ്രതികളെ കസ്റ്റഡിയില് വാങ്ങാനുള്ള നടപടികള്ക്കും ഇന്ന് തുടക്കമാകും.
ക്രിസ്മസ് ദിവസം രാത്രിയാണ് കിഴക്കമ്പലത്ത് കിറ്റക്സ് കമ്പനിയില് ജോലി ചെയ്യുന്ന തൊഴിലാളികള് പോലീസിനെ ആക്രമിച്ചത്. കുന്നത്തുനാട് സ്റ്റേഷനിലെ രണ്ട് ജീപ്പുകള്ക്ക് തൊഴിലാളികള് തീയിടുകയും ചെയ്തിരുന്നു. ഇതില് ഒരു ജീപ്പ് പൂര്ണമായും കത്തി നശിച്ചു. ജീപ്പിലുണ്ടായിരുന്ന പോലീസുകാര് ഓടി രക്ഷപ്പെടുകയായിരുന്നു.
