ദില്ലി: നടി ലീന മരിയ പോള് ഉള്പ്പെട്ട ഇരുനൂറ് കോടിയുടെ സാമ്പത്തിക തട്ടിപ്പുകേസില് കൂടുതൽപേർ പിടിയിലായതായി റിപ്പോർട്ട്. കേസില് നാല് പേര് കൂടി ഇപ്പോൾ അറസ്റ്റിലായിരിക്കുകയാണ്. ദില്ലി പോലീസിന്റെ സാമ്പത്തിക കുറ്റകൃത്യ വിഭാഗമാണ് പ്രതികളെ അറസ്റ്റ് ചെയ്തത്. അതേസമയം ഇന്നലെയാണ് ലീന മരിയ പോളിനെ ദില്ലി പോലീസ് അറസ്റ്റ് ചെയ്തത്.
ലീനയുടെ പങ്കാളിയും ദില്ലി രോഹിണി ജയിലിൽ കഴിയുന്ന ചെന്നൈ സ്വദേശിയുമായ സുകേഷ് ചന്ദ്രശേഖറിന്റെ നേതൃത്വത്തിലാണ് തട്ടിപ്പുകൾ നടന്നത്. കാനറ ബാങ്കിന്റെ ചെന്നൈ അമ്പത്തൂർ ശാഖയിൽ നിന്ന് 19 കോടിയും, വസ്ത്രവ്യാപാരിയുടെ 62.47 ലക്ഷവും ഉൾപ്പെടെ തട്ടിയെടുത്ത നിരവധി സാമ്പത്തിക തട്ടിപ്പ് കേസുകളിലെ പ്രതികളാണ് സുകേഷും, ലീനയും. ഒരു കേസിൽ 2013 മേയിൽ ഇരുവരും അറസ്റ്റിലായിരുന്നു. ബോളിവുഡ് നടി ജാക്വലിൻ ഫെർണാണ്ടസ് ഉൾപ്പെടെയുള്ള സിനിമാക്കാരിൽ നിന്ന് പണം തട്ടിയെന്ന കേസും ഇവർക്കെതിരെയുണ്ട്. കൊച്ചി കടവന്ത്രയിൽ ലീനയുടെ ബ്യൂട്ടിപാർലറിൽ രവി പൂജാരിയുടെ അധോലോകസംഘം വെടിവച്ച കേസുമുണ്ട്. മലയാളത്തിൽ റെഡ് ചില്ലീസ്, ഹസ്ബൻഡ്സ് ഇൻ ഗോവ, കോബ്ര എന്നീ സിനിമകളിൽ ലീന അഭിനയിച്ചിട്ടുണ്ട്.
തട്ടിപ്പുകൾ നടത്തിയത് ഇങ്ങനെ
2397 കോടിയുടെ വായ്പ തട്ടിപ്പ്, കള്ളപ്പണം വെളുപ്പിക്കൽ തുടങ്ങിയ കേസുകളിൽ ജയിലിൽ കഴിയുന്ന ഫോർട്ടിസ് ഹെൽത്ത് കെയറിന്റെ മുൻ പ്രൊമോട്ടർ ശിവേന്ദർ സിംഗിനെയും സഹോദരൻ മൽവീന്ദർ മോഹൻ സിംഗിനെയും പുറത്തിറക്കാമെന്ന് ശിവേന്ദർ സിംഗിന്റെ ഭാര്യ അതിഥിക്ക് വാഗ്ദാനം നൽകി. തുടർന്ന് കേന്ദ്ര നിയമ സെക്രട്ടറിയാണെന്ന് സുകേഷ് പരിചയപ്പെടുത്തി, ലീന സെക്രട്ടറിയെന്നും പറഞ്ഞു. 200 കോടിരൂപ അതിഥി ഇവർക്ക് കൈമാറി. എന്നാൽ ഇതു തട്ടിപ്പെന്ന് മനസിലാക്കി അതിഥി കഴിഞ്ഞ മാസം 7ന് ദില്ലി പോലീസിൽ പരാതി നൽകി. ഇതിനുപിന്നാലെ കേസ് ഇ.ഡി ഏറ്റെടുത്തു
തുടർന്ന് സുകേശും 6 കൂട്ടാളികളും കഴിഞ്ഞ 23ന് അറസ്റ്റിലായി. അതിനുപിന്നാലെ ചെന്നൈ ബംഗ്ലാവിൽ ഇ.ഡി റെയ്ഡ് നടന്നു. 10 ആഡംബര കാറുകളും പണവും പിടിച്ചെടുത്തു.ഇതിനുശേഷം ലീന മരിയയെ കസ്റ്റഡിയിലെടുത്തങ്കിലും വിട്ടയച്ചു. എന്നാൽ ഇന്നലെ ചോദ്യം ചെയ്യലിന് ഹാജരായ നടി അറസ്റ്റിലാവുകയായിരുന്നു.
പ്രത്യേക അറിയിപ്പ്: കോവിഡ് മഹാമാരിയുടെ രണ്ടാം വരവിന്റെ കാലത്ത് എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹിക അകലം പാലിച്ചും വാക്സിൻ എടുത്തും പ്രതിരോധത്തിന് തയ്യാറാവണമെന്ന് തത്വമയി ന്യൂസ് അഭ്യർത്ഥിക്കുന്നു. ഓർക്കുക ഒന്നിച്ചു നിന്നാൽ നമുക്കീ മഹാമാരിയെ തോൽപ്പിക്കാനാവും. “സർക്കാർ നിർദ്ദേശങ്ങൾ പാലിക്കാം, നമുക്ക് മഹാമാരിയെ ഒന്നിച്ചു നേരിടാം”. വാക്സിന് എടുത്തും, സാമൂഹിക അകലം പാലിച്ചും, മാസ്ക് ധരിച്ചും ഈ മഹാമാരിയെ നമുക്ക് എത്രയുംവേഗം വേരോടെ പിഴുതെറിയാം. #BreakTheChain #CovidBreak #IndiaFightsCorona