അസം: 1100 കിലോഗ്രാം കഞ്ചാവുമായി ഒരാളെ പോലീസ് അറസ്റ്റ് ചെയ്തു. അസം-ത്രിപുര അതിർത്തിയിൽ നിന്നും ബീഹാർ സ്വദേശിയായ മനീഷ് കുമാറിനെയാണ് പിടികൂടിയത്. 2 കോടി രൂപ വിലമതിക്കുന്ന കഞ്ചാവ് ട്രക്കിലൂടെ കടത്താൻ ശ്രമിക്കുകയായിരുന്നു എന്ന് പോലീസ് പറഞ്ഞു.
ത്രിപുരയിൽ നിന്നും ഗുവാഹട്ടിയിലേക്ക് പോവുകയായിരുന്ന ട്രക്കിൽ വലിയ തോതിൽ ലഹരി വസ്തുക്കൾ കടത്തുന്നുണ്ടെന്ന രഹസ്യ വിവരത്തെ തുടർന്ന് നടത്തിയ തിരച്ചിലിലാണ് മാരക അളവിലുള്ള കഞ്ചാവ് കണ്ടെത്തിയത്. ട്രക്കിൽ രഹസ്യ അറയുണ്ടാക്കി കഞ്ചാവ് അതിൽ സൂക്ഷിച്ചിരിക്കുകയായിരുന്നു.
അടുത്ത കാലത്ത് നടത്തിയ ഏറ്റവും വലിയ കഞ്ചാവ് വേട്ടയാണിതെന്ന് പോലീസ് പറഞ്ഞു. ഇയാൾ ഇതിന് മുൻപ് പലതവണയായി ലഹരി വസ്തുക്കൾ കടത്തിയിട്ടുണ്ടെന്ന് ചോദ്യം ചെയ്യലിൽ നിന്നും വ്യക്തമായെന്ന് അന്വേഷണ ഉദ്യോഗസ്ഥർ അറിയിച്ചു. കൂടുതൽ ചോദ്യം ചെയ്യുന്നതിലൂടെ ഇയാൾക്ക് ലഹരി മാഫിയകളുമായുള്ള ബന്ധം അറിയാൻ സാധിക്കുമെന്ന് പോലീസ് പറഞ്ഞു.
