മദ്ധ്യപ്രദേശ് : ഉജ്ജയിനിയിലെ മഹാകാലേശ്വര ക്ഷേത്ര ഇടനാഴി വികസന പദ്ധതിയുടെ ആദ്യ ഘട്ടം പ്രധാനമന്ത്രി നരേന്ദ്രമോദി ഇന്ന് ഉദ്ഘാടനം ചെയ്യും. 856 കോടി രൂപ ചെലവിലാണ് നിര്മ്മാണം നടത്തിയത് . ഭോപ്പാലില് നിന്നും 200 കിലോമീറ്റര് അകലെയുള്ള മഹാകാലേശ്വര ക്ഷേത്ര ഇടനാഴിയുള്പ്പെടെ നിരവധി വികസന പദ്ധതിയുടെ ആദ്യഘട്ട ഉദ്ഘാടനമാണ് പ്രധാനമന്ത്രി ഇന്ന് നിര്വ്വഹിക്കുക.
തിരഞ്ഞെടുപ്പിനോടനുബന്ധിച്ച് മൂന്ന് ദിവസത്തെ സന്ദര്ശനത്തിനായി പ്രധാനമന്ത്രി നരേന്ദ്രമോദി ഗുജറാത്തിലെത്തിയിട്ടുണ്ട് . ഉച്ചയ്ക്ക് ശേഷം അഹമ്മദാബാദ് അസര്വയിലെ സിവില് ഹോസ്പിറ്റലില് വിവിധ പദ്ധതികളുടെ തറക്കല്ലിടുകയും തുടര്ന്ന് ഉജ്ജയിനിയിലേക്ക് പോകുകയും ചെയ്യും. വൈകിട്ട് 5.45ന് മഹാകാലേശ്വര ക്ഷേത്രത്തില് ദര്ശനവും പൂജയും പ്രധാനമന്ത്രി നടത്തുമെന്നാണ് റിപ്പോർട്ട് .തുടര്ന്ന് വൈകുന്നേരം 6:30 ന് മഹാകാലേശ്വര ക്ഷേത്ര ഇടനാഴി വികസന പദ്ധതിയുടെ ആദ്യ ഘട്ടം പ്രധാനമന്ത്രി നരേന്ദ്രമോദി ഉദ്ഘാടനം ചെയ്യുകയും തുടര്ന്ന് 7:15 ന് ഉജ്ജയിനില് പൊതുപരിപാടിയില് സംസാരിക്കുകയും ചെയ്യും.
വിശ്വാസത്തിന്റെയും ആത്മീയതയുടെയും വിശുദ്ധ നഗരമായ ഉജ്ജയിനി ഒരു ചരിത്ര മുഹൂര്ത്തത്തിനാണ് സാക്ഷ്യം വഹിക്കാന് പോകുന്നതെന്ന് പ്രധാനമന്ത്രി ട്വിറ്ററില് കുറിച്ചു.
900 മീറ്ററിലധികം നീളമുള്ള ഇടനാഴിയായ മഹാകാല് ലോകിന്റെ ഉദ്ഘാടനത്തിനായുള്ള ഒരുക്കങ്ങളെല്ലാം പൂര്ത്തിയായിക്കഴിഞ്ഞു. ഇന്ത്യയില് ഇതുവരെ നിര്മ്മിച്ചിട്ടുള്ളതില് വെച്ച് ഏറ്റവും വലിയ ഇടനാഴികളില് ഒന്നാണിത്. പുരാതന മഹാകാലേശ്വര് ക്ഷേത്രത്തിന് ചുറ്റുമുള്ള പുനര്വികസന പദ്ധതിയുടെ ഭാഗമായാണ് മഹാകാല് ലോക് പുനര് നിര്മ്മിച്ചിരിക്കുന്നത്. പഴയ രുദ്രാസാഗര് തടാകത്തിന് സമീപമാണ് ഈ ഇടനാഴി.
പദ്ധതി നഗരത്തിലെ ടൂറിസം മേഖലയ്ക്ക് ഗുണകരമാകുമെന്ന് മദ്ധ്യപ്രദേശിലെ ഭവന, നഗര വികസന മന്ത്രി ഭൂപേന്ദ്ര സിംഗ് പറഞ്ഞു.
