ഹൈദരാബാദ് : പ്രധാനമന്ത്രി നരേന്ദ്ര മോദിയെ അവഹേളിച്ച് തെലങ്കാന മുഖ്യമന്ത്രി രേവന്ത് റെഡ്ഡി. കരിമൂർഖനോട് ഉപമിച്ചാണ് രേവന്ത് റെഡ്ഡി മോദിയെ അവഹേളിച്ചത്. മോദിയെ അധികാരത്തിലെത്തിച്ചാൽ മൂർഖനെ പോലെ കർഷകരെ തിരിച്ച് കൊത്തുമെന്നാണ് രേവന്ത് റെഡ്ഡിയുടെ വിവാദ പരാമർശം.
ലോക്സഭ തെരഞ്ഞെടുപ്പ് പ്രചാരണത്തിൽ ബിജെപിക്കെതിരെ അതിരൂക്ഷമായ വിമർശനങ്ങളാണ് രേവന്ത് റെഡ്ഡി ഉന്നയിക്കുന്നത്. ഇതിന് തുടർച്ചയായാണ് ഇപ്പോൾ പ്രധാനമന്ത്രിയെ തന്നെ നേരിട്ട് അവഹേളിച്ചിരിക്കുന്നത്. ലോക്സഭ തെരഞ്ഞെടുപ്പിൽ 400 സീറ്റ് സ്വന്തമാക്കി മൂന്നിൽ രണ്ട് ഭൂരിപക്ഷം നേടി രാജ്യത്തെ കർഷകരെ കോർപ്പറേറ്റ് ഭീമന്മാരുടെ അടിമകളാക്കി മാറ്റാനാണ് ബിജെപി ശ്രമിക്കുന്നത്. എസ്.സി, എസ്.ടി, ഒ.ബി.സി വിഭാഗങ്ങളുടെയും ന്യൂനപക്ഷങ്ങളുടെയും സംവരണങ്ങളും ഇല്ലായ്മ ചെയ്യുമെന്നുമൊക്കെയാണ് രേവന്ത് റെഡ്ഡിയുടെ വാദങ്ങൾ.