മലപ്പുറം: മലപ്പുറം നിലമ്പൂര് വഴിക്കടവില് പ്ലാസ്റ്റിക് ദേശീയ പതാക കത്തിച്ചെന്ന പരാതിയിൽ പൊലീസ് കേസെടുത്തു. സംഭവത്തിൽ പൂവത്തിപ്പൊയില് കുന്നത്ത് കുഴിയില് വീട്ടില് ചന്ദ്രൻ എന്നയാളെ വഴിക്കടവ് പൊലീസ് അറസ്റ്റ് ചെയ്തു. വഴിക്കടവ് പഞ്ചായത്തിന് മുന്വശമുള്ള റോഡില് മാലിന്യങ്ങളുടെ കൂട്ടത്തില് ഇട്ട് പ്ലാസ്റ്റിക് നിര്മിത ദേശീയ പതാക കത്തിച്ചെന്നാണ് പൊലീസിന് ലഭിച്ച പരാതി. യുവമോർച്ച നേതാക്കളാണ് പരാതി നൽകിയത്. പഞ്ചായത്തിന് മുന്വശം കച്ചവടം നടത്തുന്നയാളാണ് ചന്ദ്രന്. ഇയാളെ പിന്നീട് ജാമ്യത്തിൽ വിട്ടു.
അതേസമയം, സ്വാതന്ത്ര്യത്തിന്റെ എഴുപത്തിയഞ്ചാം വാർഷികത്തിന്റെ ഭാഗമായി എല്ലാ വീടുകളിലും ദേശീയ പതാക ഉയര്ത്താനുള്ള ‘ഹർ ഘർ തിരംഗ’ പ്രചാരണം രാജ്യം അഭിമാനപൂര്വ്വം ഏറ്റെടുത്തു. ‘ഹർ ഘർ തിരംഗ’യുടെ ഭാഗമായി കേന്ദ്രമന്ത്രിമാര് ഉള്പ്പെടെയുള്ളവർ വീടുകളില് പതാക ഉയര്ത്തി. ഇന്നലെ ആരംഭിച്ച് സ്വാതന്ത്ര്യദിനം വരെ പതാക ഉയർത്താനാണ് സർക്കാരിന്റെ ആഹ്വാനം. സ്വാതന്ത്ര്യത്തിന്റെ വജ്ര ജൂബിലി ജയന്തി വീടുകളില് പതാക ഉയർത്തി ആഘോഷിക്കുകയാണ് രാജ്യം.