ജിദ്ദ: പ്രശ്‌നബാധിത മേഖലയായ സുഡാനിൽ നിന്നും പൗരന്മാരെ ഒഴിപ്പിക്കുന്ന ഓപ്പറേഷൻ കാവേരി ഊർജ്ജിതമാക്കി ഇന്ത്യ. ഇതിനോടകം മൂവായിരത്തിലധികം പേരെ വിജയകരമായി ഒഴിപ്പിക്കാൻ ഇന്ത്യക്കായി. 186 യാത്രക്കാരടങ്ങുന്ന ഒൻപതാമത്തെ സംഘം ജിദ്ദയിൽ നിന്നും കൊച്ചിയിലേക്ക് യാത്ര തിരിച്ചിട്ടുണ്ട്. സൗദിയിലെ ജിദ്ദ ഇടത്താവളമാക്കിയാണ് ഇന്ത്യ രാക്ഷാ ദൗത്യം ഏകോപിപ്പിക്കുന്നത്, വ്യോമസേനയുടെ വിമാനങ്ങളും നാവികസേനയുടെ കപ്പലുകളും ഉപയോഗിച്ചാണ് രക്ഷാ ദൗത്യം തുടരുന്നത്. വിദേശകാര്യ സഹമന്ത്രി വി മുരളീധരനാണ് ഏകോപന ചുമതല.
3000 ഇന്ത്യക്കാർ സുഡാൻ വിട്ടതായും ഒൻപതാം സംഘം ജിദ്ദയിൽ നിന്ന് യാത്ര തിരിച്ചതായും വിദേശകാര്യ സെക്രട്ടറി അരിന്ദം ബാഗ്ചി അൽപ്പസമയം മുമ്പ് ട്വീറ്റ് ചെയ്തു. മൂവായിരം ഇന്ത്യക്കാരും 1000 ത്തോളം ഇന്ത്യൻ വംശജരുമാണ് സുഡാനിലുള്ളത്. നിരവധി രാജ്യങ്ങൾ രക്ഷാദൗത്യം നടത്തുന്നതിനാൽ സുഡാനിൽ വെടിനിർത്തൽ പ്രഖ്യാപിച്ചിരിക്കുകയാണ്.
