കൊല്ലം: കുണ്ടറയില് പ്രതിയെ അറസ്റ്റ് ചെയ്യാനെത്തിയ പോലീസിനെ പ്രതിയുടെ മാതാപിതാക്കള് ആക്രമിച്ചു. ഈ അവസരം മുതലെടുത്ത് പ്രതി ഓടി രക്ഷപെട്ടു. അയല്വാസിയെ വധിക്കാന് ശ്രമിച്ചകേസിലെ ഒന്നാം പ്രതിയായ പടപ്പാക്കര ഫാത്തിമ ജംഗ്ഷന് സ്വദേശി അബിന് ചാള്സാണ് രക്ഷപ്പെട്ടത്.
മാവേലിക്കരയില് കൊലപാതക കേസില് പ്രതിയായ അബിന് ജാമ്യത്തിലിറങ്ങിയതറിഞ്ഞാണ് എ.എസ്.ഐ സതീശന്, സി.പി.ഒ റിജു എന്നിവര് വീട്ടിലെത്തിയത്. വീട്ടില് എത്തി അറസ്റ്റ് രേഖപ്പെടുത്താനൊരുങ്ങിയപ്പോഴാണ് പ്രതിയുടെ അച്ഛനും അമ്മയും പോലീസിനെ ആക്രമിച്ചത്. ഈ സമയം പ്രതി ഓടി രക്ഷപെടുകയായിരുന്നു.
പോലീസിനെ ആക്രമിക്കല്, പ്രതിയെ രക്ഷപ്പെടുത്തല് എന്നിങ്ങനെ രണ്ട് കേസുകള് പ്രതിക്കും മാതാപിതാക്കള്ക്കുമെതിരെ രജിസ്റ്റര് ചെയ്തു. രക്ഷപെട്ട പ്രതിക്കായി കുണ്ടറ പോലീസ് തിരച്ചില് ഊര്ജിതമാക്കി. മര്ദനത്തില് പരിക്കേറ്റ പോലീസുകാര് കുണ്ടറ താലൂക് ആശുപത്രിയില് ചികിത്സ തേടി.
