ബ്രണ്ണന്‍ തല്ലില്‍ മുഖ്യമന്ത്രി ഇനി പ്രതികരിക്കില്ല: സുധാകരന്റെ ഭൂതകാലം ചര്‍ച്ചയാക്കാന്‍ നീക്കം

തിരുവനന്തപുരം : കെ.സുധാകരനുമായിട്ടുള്ള തര്‍ക്കത്തില്‍ ഇനി പ്രതികരിക്കേണ്ടതില്ലെന്ന നിലപാടില്‍ മുഖ്യമന്ത്രി പിണറായി വിജയന്‍. പറയേണ്ട കാര്യങ്ങളെല്ലാം പറഞ്ഞ് കഴിഞ്ഞതിനാല്‍ ഇനി പ്രതികരിക്കേണ്ടതില്ലെന്നാണ് മുഖ്യമന്ത്രിയുടെ തീരുമാനം. എന്നാല്‍ കെ.സുധാകരന്റെ പഴയകാല രാഷ്ട്രീയം ചര്‍ച്ചയാക്കാന്‍ സി.പി.എം തീരുമാനിച്ചിട്ടുണ്ട്. ഒരു വാരികക്ക് നല്‍കിയ അഭിമുഖത്തിലാണ് കെ.സുധാകരന്‍ മുഖ്യമന്ത്രിക്ക് എതിരെ വ്യക്തിപരമായ പരാമര്‍ശങ്ങള്‍ നടത്തിയത്. തുടര്‍ന്നാണ് മുഖ്യമന്ത്രി കഴിഞ്ഞ ദിവസം വാര്‍ത്താസമ്മേളനം നടത്തി സുധാകരനെ രൂക്ഷമായി വിമര്‍ശിച്ചത്. കെ.സുധാകരന്റെ ഭൂതകാല രാഷ്ട്രീയം ചര്‍ച്ചയാക്കാനുള്ള സി.പി.എമ്മിന്റെ രാഷ്ട്രീയ നീക്കത്തിന്റെ ഭാഗമായിട്ടാണ് മുതിര്‍ന്ന നേതാക്കളായ ഇ.പി.ജയരാജന്‍, എ.കെ.ബാലന്‍, എം.എ.ബേബി എന്നിവര്‍ രംഗത്ത് എത്തിയത്. സി.പി.എം സംസ്ഥാന സെക്രട്ടറിയേറ്റും ഈ നീക്കത്തിന് പൂര്‍ണ പിന്തുണ നല്‍കിയിരിക്കുകയാണ്.