കോഴിക്കോട് : മാനസികാസ്വാസ്ഥ്യമുള്ള യുവതിയെ കബളിപ്പിച്ച് ബസില്‍ കയറ്റി പീഡിപ്പിച്ച കേസിലെ പ്രതിക്കായി പോലീസ് ലുക്കൗട്ട്‌നോട്ടീസ് പുറത്തിറക്കി. കുന്നമംഗലം പന്തീര്‍പാടം, പാണരുകണ്ടത്തില്‍ വീട്ടില്‍ ഇന്ത്യേഷ് (38) നെതിരേയാണ് കോഴിക്കോട് സിറ്റി പോലീസ് ലുക്കൗട്ട് നോട്ടീസ് പുറത്തിറക്കിയത്.
സംസ്ഥാനത്തെ എല്ലാപോലീസ് സ്‌റ്റേഷനുകളിലേക്കും വിമാനതാവളം, റെയില്‍വേസ്‌റ്റേഷന്‍ എന്നിവിടങ്ങളിലേക്കും പ്രതിയുടെ ഫോട്ടോ സഹിതമുള്ള വിവരങ്ങള്‍ കൈമാറിയിട്ടുണ്ട്.
സംഭവത്തില്‍ കുന്നമംഗലം സ്വദേശികളായ മലയൊടിയാറുമ്മല്‍ വീട്ടീല്‍ ഗോപീഷ് (38), പത്താം മൈല്‍ മേലേ പൂളോറ വീട്ടില്‍ മുഹമ്മദ് ഷമീര്‍ (32) എന്നിവരെ പിടികൂടിയിരുന്നു. കഴിഞ്ഞ ഞായറാഴ്ചയായിരുന്നു പെണ്‍കുട്ടി പീഡനത്തിനിരയായത്. രാത്രി വഴക്കിട്ട് വീട്ടില്‍നിന്നിറങ്ങിയ യുവതിയെ സ്‌കൂട്ടറില്‍ കയറ്റി മുണ്ടിക്കല്‍താഴം റോഡില്‍ നിര്‍ത്തിയിട്ടിരുന്ന ബസിലെത്തിച്ച് പീഡിപ്പിക്കുകയായിരുന്നു. രാത്രി വീട്ടില്‍ തിരിച്ചെത്തിയ യുവതിയുടെ കൈയിലെ പണം കണ്ട് വീട്ടുകാര്‍ ചോദിച്ചപ്പോഴാണ് പീഡനവിവരം അറിയുന്നത്. തുടർന്ന് അവർ വിവരം പോലീസ് സ്റ്റേഷനിൽ അറിയിച്ചു
