മുംബൈ: അധോലോക നായകനും ഭീകരനുമായ ദാവൂദ് ഇബ്രാഹിമിന്റെ സ്വത്തുക്കൾ കണ്ടുകെട്ടി ലേലം ചെയ്യുന്നത് തുടർന്ന് ഇന്ത്യൻ അധികൃതർ. ഇത്തവണ ദാവൂദിന്റെ അമ്മ ആമിന ബിയുടെ ഭൂസ്വത്തുക്കളാണ് ലേലം ചെയ്‌ത്‌ വിൽക്കുന്നത്. മഹാരാഷ്ട്രയിലെ രത്‌നഗിരി ജില്ലയിലെ നാല് ഭൂസ്വത്തുക്കളാണ് ലേലം ചെയ്യുക. ദാവൂദും സഹോദരങ്ങളും കുട്ടിക്കാലത്ത് കഴിഞ്ഞിരുന്നത് ഇവിടെയാണ്. വരുന്ന വെള്ളിയാഴ്ച മുംബൈയിലാണ് ലേലം നിശ്ചയിച്ചിരിയ്ക്കുന്നത്. സഫേമ അഡ്മിനിസ്ട്രേറ്ററുടെ നേതൃത്വത്തിലാണ് ലേലം നടക്കുക.
നരേന്ദ്രമോദി സർക്കാർ അധികാരത്തിൽ വന്നതിന് ശേഷം കഴിഞ്ഞ ഒൻപത് വർഷത്തിനിടയിൽ ദാവൂദിന്റെയും കൂട്ടാളികളുടെയും 11 സ്വത്തുക്കളാണ് കണ്ടുകെട്ടി ലേലം ചെയ്തത്. 19.2 ലക്ഷം രൂപ മതിപ്പ് വിലവരുന്ന നാല് പ്ലോട്ട് കൃഷിഭൂമികളാണ് ലേലം ചെയ്യുന്നത്. ഇ ലേലമായും, പൊതു ലേലമായും, സീൽഡ് റെൻഡറായും ഒരേസമയം തന്നെ ലേലം നടക്കും. വർഷങ്ങൾക്ക് മുന്നേ കണ്ടുകെട്ടിയ സ്വത്തുക്കളാണിത്. ലേലത്തിൽ വിജയിക്കുന്നയാളുടെ പേരിലേക്ക് ഭൂമി മാറ്റാൻ സാധിക്കും. പാർട്ടിസിപ്പേഷൻ ഫോം നൽകി തുക കെട്ടിവയ്ക്കാനുള്ള അവസാന ദിവസം ബുധനാഴ്ചയാണ്.
കള്ളക്കടത്തും വിദേശനാണ്യ ക്രമക്കേടും തടയുക എന്ന ലക്ഷ്യത്തോടെയുള്ള സ്മഗ്ഗ്ളേർസ് ആൻഡ് ഫോറിൻ എക്സ്ചേഞ്ച് മാനിപ്പുലേറ്റർസ് ആക്ട് അഥവാ സഫേമ അനുസരിച്ചാണ് സ്വത്തുക്കൾ കണ്ടുകെട്ടുന്നത്. 1976 ൽ പാസാക്കിയ നിയമമാണിത് . കേന്ദ്ര സർക്കാരിന്റെ റവന്യു വകുപ്പാണ് ഈ നിയമം അനുസരിച്ച് സ്വത്തുക്കൾ കണ്ടുകെട്ടുന്നതും ലേലം ചെയ്‌ത്‌ വിൽക്കുന്നതും.
രണ്ടാഴ്ച മുമ്പാണ്‌ ദാവൂദിനെ പാകിസ്ഥാനിലെ കറാച്ചിയിൽ വച്ച് അജ്ഞാതൻ വിഷം കുത്തിവച്ചെന്നും ഗുരുതരാവസ്ഥയിൽ ആശുപത്രിയിലാണെന്നുമുള്ള വാർത്തകൾ പരന്നത്. എന്നാൽ ദാവൂദിന്റെ ഏറ്റവും അടുത്ത കൂട്ടാളി അത്തരം വാർത്തകൾ നിഷേധിച്ചിരുന്നു. 2017 ലാണ് കേന്ദ്രസർക്കാർ ദാവൂദിന്റെയും കൂട്ടാളികളുടെയും സ്വത്തുക്കൾ ലേലത്തിൽ വിറ്റഴിച്ച് 11 കോടി രൂപ നേടിയത്.
