വാഷിങ്ടൺ: വൈറ്റ് ഹൗസ് കറസ്പോണ്ടന്റ്സ് ഡിന്നറിനിടെയുണ്ടായ വെടിവെപ്പിലെ അക്രമിയെ തിരിച്ചറിഞ്ഞു. 31 വയസ്സുള്ള കോൾ തോമസ് അലൻ എന്നയാളാണ് സംഭവത്തിൽ പിടിയിലായതെന്ന് മാധ്യമ റിപ്പോർട്ടുകൾ വ്യക്തമാക്കുന്നു. കാലിഫോർണിയ സ്വദേശിയായ ഇയാളെ സംഭവത്തിന് പിന്നാലെ തന്നെ പോലീസ് കസ്റ്റഡിയിലെടുത്തിരുന്നു.
പ്രതിയുടെ രാഷ്ട്രീയ ബന്ധത്തെക്കുറിച്ചുള്ള വെളിപ്പെടുത്തലുകൾ അമേരിക്കൻ രാഷ്ട്രീയ വൃത്തങ്ങളിൽ വലിയ ചർച്ചയ്ക്ക് വഴിവെച്ചിട്ടുണ്ട്. യുഎസ് പ്രസിഡന്റ് ഡൊണാൾഡ് ട്രംപിന്റെ സഹായി ലോറ ലൂമറാണ് അക്രമിക്കെതിരെ ഗുരുതരമായ ആരോപണങ്ങളുമായി രംഗത്തെത്തിയത്. കോൾ തോമസ് അലൻ രജിസ്റ്റർ ചെയ്ത ഡെമോക്രാറ്റ് പാർട്ടി പ്രവർത്തകനാണെന്നും, കമല ഹാരിസിന്റെ 2024 പ്രസിഡന്റ് തിരഞ്ഞെടുപ്പ് പ്രചാരണത്തിനായി ഇയാൾ സംഭാവന നൽകിയിട്ടുണ്ടെന്നുമാണ് ലോറ ലൂമർ അവകാശപ്പെടുന്നത്.
അക്രമിയുടെ വ്യക്തിവിവരങ്ങൾ പുറത്തുവന്നതോടെ അന്വേഷണം കൂടുതൽ ശക്തമാക്കിയിരിക്കുകയാണ് പോലീസ്. ഇയാളുടെ രാഷ്ട്രീയ ബന്ധങ്ങളും വെടിവെപ്പിന് പിന്നിലെ കൃത്യമായ ലക്ഷ്യവും ഉൾപ്പെടെയുള്ള കാര്യങ്ങൾ പരിശോധിച്ചുവരികയാണ്. കസ്റ്റഡിയിലുള്ള പ്രതിയെ കൂടുതൽ ചോദ്യം ചെയ്യലിന് വിധേയനാക്കും.
