ദില്ലി: 1933 ൽ തുടക്കം കുറിച്ച ശിവഗിരി തീർത്ഥാടനത്തിന്റെ തൊണ്ണൂറാം വാർഷികവും ബ്രഹ്മവിദ്യാലയത്തിന്റെ സുവർണ്ണ ജൂബിലി ആഘോഷവും പ്രധാനമന്ത്രി നരേന്ദ്രമോദി ഉദ്ഘാടനം ചെയ്തു. ദില്ലിയിൽ നിന്നും വീഡിയോ കോൺഫെറെൻസിലുടെയാണ് പ്രധാനമന്ത്രി ഒരു വർഷം നീണ്ടുനിൽക്കുന്ന ആഘോഷ പരിപാടികൾക്ക് തുടക്കം കുറിച്ചത്. മുണ്ടും ഷർട്ടും ധരിച്ച് ചടങ്ങിനെത്തിയ പ്രധാനമന്ത്രി മലയാളത്തില്‍ സംസാരിച്ച് തുടങ്ങിയാണ് ചടങ്ങ് ഉദ്ഘാടനം ചെയ്തത്.
ശ്രീ നാരായണ ഗുരുദേവൻ ഇന്ത്യയുടെ ആധ്യാത്മിക ചൈതന്യമെന്ന് അദ്ദേഹം പറഞ്ഞു ശ്രീനാരായണ ഗുരുവിന്‍റെ ഒരു ജാതി ഒരു മതം ഒരു ദൈവം എന്ന ദര്‍ശനം ദേശ സ്നേഹത്തിന് ആധ്യാത്മികമായ ഉയരം നല്കുന്നതാണെന്ന് പ്രധാനമന്ത്രി നരേന്ദ്ര മോദി പറഞ്ഞു. ആധുനികതയെക്കുറിച്ച് സംസാരിക്കുമ്പോഴും ഇന്ത്യൻ സംസ്കാരത്തെയും മൂല്യങ്ങളെയും ഗുരു സമ്പന്നമാക്കി. ശിവഗിരിയടക്കമുള്ള സ്ഥലങ്ങള്‍ ഏകഭാരതം, ശ്രേഷ്ഠ ഭാരതം എന്ന ആശയത്തിന്റെ പ്രതിഷ്ഠാ സ്ഥാനമാണ്. ഗുരുവിന്‍റെ ജനനത്തിലൂടെ കേരളം പുണ്യഭൂമിയായി മാറി. വര്‍ക്കലയെ ദക്ഷിണകാശിയെന്ന് വിശേഷിപ്പിച്ചുകൊണ്ടാണ് പ്രധാനമന്ത്രി ഉദ്ഘാടന പ്രസംഗത്തിലേക്ക് കടന്നത്.
എല്ലാവർഷവും ഡിസംബർ 30 മുതൽ ജനുവരി 1 വരെയാണ് ശിവഗിരി തീർത്ഥാനം നടക്കുക. ഓരോ വർഷവും ലക്ഷക്കണക്കിന് ഭക്തരാണ് തീർത്ഥാടനത്തിലെത്തുന്നത്. കേന്ദ്രമന്ത്രി വി മുരളീധരനും ശിവഗിരി മഠം സന്യാസ പ്രമുഖരും ചടങ്ങിൽ പങ്കെടുത്തു. ഗുജറാത്ത് മുഖ്യമന്ത്രിയായിരുന്ന സമയം മുതൽ ശിവഗിരി മഠവുമായുള്ള ബന്ധം വിശദീകരിച്ച പ്രധാനമന്ത്രി കേരളത്തിന്റെ പുരോഗതിക്കും നവോത്ഥാനത്തിനും ശിവഗിരി മഠം നൽകുന്ന സംഭാവനകളെ പ്രകീർത്തിച്ചു.
