മോഹൻലാൽ നായകനായ പ്രിയദർശൻ ചിത്രം ‘മരയ്ക്കാർ അറബിക്കടലിന്റെ സിംഹം‘എന്ന ചിത്രത്തിനായി കാത്തിരിക്കുകയാണ് സിനിമാ പ്രേമികൾ. ചിത്രം ഒടിടിയിൽ എത്തുമോ അതോ തിയറ്ററിൽ എത്തുമോ എന്ന കാര്യത്തിൽ ഇതുവരെ വ്യക്തത വന്നിട്ടില്ല. ഇതു സംബന്ധിച്ചുള്ള ഔദ്യോഗിക പ്രഖ്യാപനം ഉടനുണ്ടാകും. ആമസോൺ പ്രൈമിലൂടെയാകും ചിത്രം പ്രേക്ഷകരിലേക്ക് എത്തുക എന്നാണ് നിലവിൽ പുറത്ത് വരുന്ന റിപ്പോർട്ട്. എന്നാൽ ചിത്രം വാർത്തകളിൽ നിറഞ്ഞു നിൽക്കുന്നതിനിടെ മരക്കാരുടെ സെറ്റിലെ ഒരു സർപ്രൈസ് വിസിറ്റിന്റെ വിഡിയോ പങ്കുവച്ചിരിക്കുകയാണ് അണിയറ പ്രവർത്തകർ. തമിഴ് സൂപ്പർതാരം തല അജിത്താണ് അപ്രതീക്ഷിതമായി ലൊക്കേഷനിൽ എത്തിയത്.
മരക്കാരിന്റെ ചിത്രീകരണം നടക്കുമ്പോഴായിരുന്നു തല അജിത്തിന്റെ മിന്നൽ സന്ദർശനം. ഹൈദരാബാദ് ഫിലിം സിറ്റിയില്‍ ചിത്രത്തിനായി ഒരുക്കിയ ബ്രഹ്മാണ്ഡ സെറ്റിലേക്കാണ് അതിഥി എത്തിയത്. തുടർന്ന് സെറ്റിലെത്തിയ അജിത്തിനെ മോഹന്‍ലാലും പ്രിയദര്‍ശനുമടക്കമുള്ളവർ ചേര്‍ന്ന് സ്വീകരിച്ചു. മരക്കാറിലെ മറ്റ് പ്രധാന കഥാപാത്രങ്ങളെ അവതിരിപ്പിക്കുന്ന അര്‍ജുന്‍, സുനില്‍ ഷെട്ടി, നെടുമുടി വേണു, മുകേഷ്, സിദ്ദിഖ് എന്നിവരുമായി അജിത് കുശലം പറയുന്നതും വീഡിയോയില്‍ കാണാം. താരങ്ങളെല്ലാം ഷോട്ടിന് തയാറായി കോസ്റ്റ്യൂമിൽ നിൽക്കുമ്പോഴായിരുന്നു സന്ദർശനം. ഇപ്പോൾ സോഷ്യൽ മീ‍ഡിയയിൽ വൈറലാവുകയാണ് വിഡിയോ.
അതേസമയം ബിഗ് ബജറ്റ് മോഹന്‍ ലാല്‍ ചിത്രം മരയ്ക്കാര്‍ തിയേറ്ററുകളില്‍ റിലീസ് ചെയ്യില്ല. തിയേറ്റർ ഉടമകളുമായുള്ള ചർച്ചകൾ എല്ലാം അവസാനിപ്പിച്ചന്ന് ചേംബർ പ്രസിഡന്‍റ് ജി സുരേഷ് കുമാര്‍ വ്യക്തമാക്കി. ആമസോൺ പ്രൈം വഴിയാകും ചിത്രം റിലീസാവുക. മരക്കാര്‍ റിലീസുമായി ബന്ധപ്പെട്ട തര്‍ക്ക പരിഹാരത്തിന് മന്ത്രി സജി ചെറിയാൻ വിളിച്ച യോഗം മാറ്റിവെച്ചിരുന്നു. സംഘടനാ പ്രതിനിധികളിൽ ചിലരുടെ അസൗകര്യം കണക്കിലെടുത്താണ് ചർച്ച മാറ്റിയതെന്നായിരുന്നു വിശദീകരണം. എല്ലാവർക്കും സൗകര്യപ്രദമായ മറ്റൊരു തീയതിയിൽ ചർച്ച നടത്തുമെന്നും മന്ത്രിയുടെ ഓഫീസ് അറിയിച്ചിരുന്നു.
പലതവണയാണ് ചിത്രം തീയറ്ററിൽ പ്രദർശിപ്പിക്കാനുള്ള ചർച്ചകൾ നടന്നത്. 10 കോടി വരെ നൽകാം എന്ന് ഫിയോക്ക് നിലപാട് എടുത്തെങ്കിലും കൂടുതൽ തുക വേണമെന്ന് നിർമാതാവ് ആൻ്റണി പെരുമ്പാവൂർ അറിയിച്ചു. പക്ഷേ അത്രയും തുക നൽകാൻ സാധിക്കില്ലെന്ന് തീയറ്റർ ഉടമകൾ അറിയിക്കുകയും ചെയ്തു. മരക്കാര്‍ റിലീസ് വിവാദമായിരിക്കെ തിയേറ്റര്‍ ഉടമകളുടെ സംഘടനായ ഫിയോക്കില്‍ നിന്നും ആന്റണി പെരുമ്പാവൂര്‍ രാജിവച്ചിരുന്നു.
ചിത്രം തീയേറ്ററിൽ എത്തുന്നതിനു മുൻപ് തന്നെ നിരവധി പുരസ്‌കാരങ്ങളാണ് നേടിയത്. മോഹൻലാലിന് പുറമെ ഹിന്ദി, തമിഴ്, തെലുങ്ക്, കന്നഡ, ഭാഷകളിലെ നിരവധി താരങ്ങൾ ചിത്രത്തിൽ അണിനിരക്കുന്നത്. പ്രണവ് മോഹൻലാൽ, പ്രഭു, അർജുൻ, ഫാസിൽ, സുനിൽ ഷെട്ടി, മഞ്ജു വാര്യർ, കീർത്തി സുരേഷ്, കല്യാണി പ്രിയദർശൻ, നെടുമുടി വേണു, മുകേഷ്, സിദ്ദിഖ്, രഞ്ജി പണിക്കർ, ഹരീഷ് പേരടി തുടങ്ങിയ വമ്പൻ താരനിരയാണ് ചിത്രത്തിലുള്ളത്.
