തൃശ്ശൂര്‍ : വെങ്കിടങ്ങില്‍ മതില്‍ ഇടിഞ്ഞു വീണ് ഏഴുവയസ്സുകാരിക്ക് ദാരുണാന്ത്യം. യൂത്ത് കോണ്‍ഗ്രസ് മണലൂര്‍ നിയോജക മണ്ഡലം പ്രസിഡന്റ് മാമ്പുറം തൊട്ടിപറമ്പില്‍ വീട്ടില്‍ മഹേഷ് കാര്‍ത്തികേയന്റെ മകള്‍ ദേവിഭദ്രയാണ് മരിച്ചത്. മേച്ചേരിപ്പടി ശങ്കരനാരായണ എല്‍.പി.സ്‌കൂളിലെ രണ്ടാം ക്ലാസ് വിദ്യാർത്ഥിനിയായിരുന്നു. ഇന്ന് രാവിലെ പതിനൊന്നരയോടെയായിരുന്നു സംഭവം.
മഹേഷിന്റെ തറവാട്ട് ക്ഷേത്രത്തിലെ പ്രതിഷ്ഠാദിന ആഘോഷത്തിനിടെ സമീപത്തെ പറമ്പില്‍ കളിക്കുന്നതിനിടെ അതിര്‍ത്തി തിരിച്ച മതിലിലെ കട്ടകള്‍ ഇടിഞ്ഞു വീഴുകയായിരുന്നു. തലയ്ക്ക് ഗുരുതരമായി പരിക്കേറ്റ ദേവിഭദ്രയെ ആദ്യം മുല്ലശ്ശേരി സാമൂഹിക ആരോഗ്യ കേന്ദ്രത്തിലും തുടര്‍ന്ന് അമല ആശുപത്രിയിലും പ്രവേശിപ്പിച്ചെങ്കിലും രക്ഷിക്കാനായില്ല. അമ്മ: ലക്ഷ്മി.
