യൂത്ത് കോണ്‍ഗ്രസ് സംസ്ഥാന അദ്ധ്യക്ഷന്‍ രാഹുല്‍ മാങ്കൂട്ടത്തിലിനെ 14 ദിവസം ജയിലില്‍ അടച്ചതുകൊണ്ട് മുഖ്യമന്ത്രിക്കെതിരായ സമരങ്ങള്‍ അവസാനിക്കാന്‍ പോകുന്നില്ലെന്ന് കോണ്‍ഗ്രസ് നേതാവ് പി.സി വിഷ്ണുനാഥ് എംഎല്‍എ. വഞ്ചിയൂര്‍ കോടതി പരിസരത്ത് മാദ്ധ്യമങ്ങളോട് പ്രതികരിക്കുകയായിരുന്നു അദ്ദേഹം ചോദിച്ചു.
സര്‍ക്കാര്‍ പറയുന്നത് സമരക്കാരെ രാഹുല്‍ തടഞ്ഞില്ല എന്നാണ്. പുലര്‍ച്ചെ അറസ്റ്റ് ചെയ്തത് ക്രമസമാധാന പ്രശ്നം തടയുന്നതിനെന്നാണ്. ഇതിന് മുന്‍പ് ഒരു കള്ളക്കേസില്‍ സര്‍ക്കാര്‍ രാഹുലിനെ പ്രതിയാക്കിയ സാഹചര്യത്തില്‍ രാഹുല്‍ നേരിട്ട് ഹാജരായതാണ്. അന്ന് ഒരു തരത്തിലുള്ള പ്രതിഷേധവും ഉണ്ടായിരുന്നില്ല. രാവിലെ മുതല്‍ എന്തൊക്കെ പീഡനമാണ് രാഹുല്‍ അനുഭവിച്ചത്. വെളുപ്പിന് അറസ്റ്റ് ചെയ്യുന്നു, എ.ആര്‍ ക്യാമ്പില്‍ കൊണ്ടുപോകുന്നു. മാദ്ധ്യമങ്ങളോട് വിഷയം പറയുന്നില്ല.
ഈ നിലയില്‍ ഭ്രാന്ത് പിടിച്ച ഭരണകൂടത്തിന്റെ നടപടികളാണ് ഇവിടെ കണ്ടത്. 14 ദിവസം രാഹുലിനെ ജയിലില്‍ അടച്ചതുകൊണ്ട് പിണറായി വിജയനെതിരായ സമരങ്ങള്‍ ഒന്നും തന്നെ അവസാനിക്കാന്‍ പോകുന്നില്ല. ഈ നിമിഷം മുതല്‍ പ്രതിഷേധം മുന്നോട്ട് പോകും” – പി.സി വിഷ്ണുനാഥ് എംഎല്‍എ പറഞ്ഞു.
അതേസമയം യൂത്ത് കോൺഗ്രസിന്റെ നേതൃത്വത്തിൽ സെക്രട്ടേറിയറ്റിലേക്കു നടത്തിയ മാർച്ച് അക്രമാസക്തമായതുമായി ബന്ധപ്പെട്ട് രജിസ്റ്റർ ചെയ്ത കേസിൽ റിമാൻഡിലായ യൂത്ത് കോൺഗ്രസ് സാംസ്ഥാന അദ്ധ്യക്ഷൻ രാഹുൽ മാങ്കൂട്ടത്തലിനെ പൂജപ്പുര ജയിലിൽ എത്തിച്ചു. പൂജപ്പുര സെൻട്രൽ ജയിലിലും പ്രവർത്തകർ പ്രതിഷേധവുമായി രംഗത്തെത്തി. ജയിൽ ഗേറ്റ് തള്ളിതുറക്കാൻ ശ്രമിച്ചത് പോലീസും പ്രവർത്തകരും തമ്മിൽ വാക്കേറ്റവും ഉന്തും തള്ളിനും ഇടയാക്കി.
വരും ദിവസങ്ങളിലും പ്രതിഷേധം ശക്തമാക്കാനാണ് യൂത്ത് കോൺഗ്രസ് തീരുമാനം. ഫാസിസ്റ്റ് നയമാണ് പിണറായി സർക്കാർ നടപ്പിലാക്കുന്നതെന്ന് നേതാക്കള്‍ പ്രതികരിച്ചു. നാളെ യൂത്ത് കോൺഗ്രസ് സെക്രട്ടറിയേറ്റ് മാർച്ച് സംഘടിപ്പിക്കും
