മലയാളത്തിന്റെ സ്ക്രീനില് അനുപം ഖേറിന്റെ മുഖം ഓര്ക്കാന് ശ്രമിക്കുമ്പോള് ഭൂരിഭാഗം പ്രേക്ഷകരുടെയും മനസില് ആദ്യമെത്തുന്ന ചിത്രം മോഹന്ലാലിനെ നായകനാക്കി ബ്ലെസി സംവിധാനം ചെയ്ത പ്രണയം ആയിരിക്കും. 2011ല് പ്രദര്ശനത്തിനെത്തിയ ചിത്രത്തില് മോഹന്ലാലിന്റെ മാത്യൂസിനൊപ്പം പ്രാധാന്യമുള്ള കഥാപാത്രത്തെയാണ് അനുപം ഖേര് അവതരിപ്പിച്ചത്. അച്യുത മേനോന് എന്നായിരുന്നു അദ്ദേഹം അവതരിപ്പിച്ച കഥാപാത്രത്തിന്റെ പേര്. എന്നാല് പ്രണയത്തിനു മുന്പും അനുപം ഖേര് മലയാളത്തില് അഭിനയിച്ചിട്ടുണ്ട്. മോഹന്ലാലിന്റെ തന്നെ ഇന്ദ്രജാലം, പ്രജ, ബ്ലെസിയുടെ കളിമണ്ണ്, ഒപ്പം നയന എന്ന ചിത്രത്തിലും അനുപം ഖേര് അഭിനയിച്ചിട്ടുണ്ട്. ഇപ്പോഴിതാ എട്ട് വര്ഷത്തെ ഇടവേളയ്ക്കു ശേഷം അനുപം ഖേര് മലയാളത്തിന്റെ സ്ക്രീനിലേക്ക് മടങ്ങിയെത്തുകയാണ്. ദിലീപിനെ നായകനാക്കി റാഫി സംവിധാനം ചെയ്യുന്ന വോയിസ് ഓഫ് സത്യനാഥന് ആണ് ചിത്രം.
ചിത്രത്തില് ജോയിന് ചെയ്തതിന്റെ സന്തോഷം അനുപം ഖേര് തന്നെയാണ് സോഷ്യല് മീഡിയയിലൂടെ പങ്കുവച്ചത്. അനുപം ഖേറിന്റെ കരിയറിലെ 531-ാം ചിത്രമാണ് ഇത്. ദിലീപ്, ജഗപതി ബാബു, ജോജു ജോര്ജ്, ജനാര്ദ്ദനന്, വീണ നന്ദകുമാര് എന്നിവര്ക്കൊപ്പം അഭിനയിക്കാനായതില് ഏറെ സന്തോഷം. ചിത്രത്തിന്റെ കഥ ഏറെ ഇഷ്ടപ്പെട്ടു. ഉഗ്രന് സിനിമ, സഹതാരങ്ങള്ക്കൊപ്പം ചിത്രത്തിന്റെ സെറ്റില് നിന്നുള്ള ചിത്രങ്ങള് പങ്കുവച്ചുകൊണ്ട് അനുപം ഖേര് കുറിച്ചു.