ദില്ലി : ഇ.പി. ജയരാജനെതിരായ ആരോപണത്തില് പ്രതികരിക്കാതെ ഒഴിഞ്ഞുമാറി മുഖ്യമന്ത്രി പിണറായി വിജയന്. വിഷയം പോളിറ്റ് ബ്യൂറോ ചര്ച്ച ചെയ്യുമോ എന്ന് ഡല്ഹിയില് മാധ്യമപ്രവര്ത്തകര് ചോദിച്ചപ്പോൾ തണുപ്പ് എങ്ങനെയുണ്ടെന്നായിരുന്നു മുഖ്യമന്ത്രിയുടെ മറുചോദ്യം. പ്രധാനമന്ത്രി നരേന്ദ്ര മോദിയെ നേരില് കാണുന്നുണ്ടോയെന്ന ചോദ്യത്തോടും അദ്ദേഹം മൗനം പാലിച്ചു .
അതേസമയം കേരളത്തില് പാര്ട്ടിക്ക് അകത്തും പുറത്തും വലിയ ചര്ച്ചാവിഷയമായതിനാല് തന്നെ ഇ.പിയുമായി ബന്ധപ്പെട്ട പരാതി പി.ബി. ചര്ച്ച ചെയ്യാനാണ് സാധ്യത. വിഷയവുമായി ബന്ധപ്പെട്ട് പി. ജയരാജന് നല്കിയ പരാതി കേന്ദ്ര നേതൃത്വത്തിന്റെ പരിഗണനയിലാണ്.
ചൊവ്വാഴ്ച രാവിലെ സി.പി.എം. സംസ്ഥാന സെക്രട്ടറി എം.വി. ഗോവിന്ദനും ഡല്ഹിയിലെത്തും. അദ്ദേഹമായിരിക്കും ഇത് പോളിറ്റ് ബ്യൂറോയിൽ അവതരിപ്പിക്കുക. പ്രധാനമന്ത്രി നരേന്ദ്രമോദിയുമായി മുഖ്യമന്ത്രി കൂടിക്കാഴ്ച നടത്തും.