അഭിനയത്തിന് പുറമെ സിനിമാ പിന്നണിഗാനരംഗത്ത് കഴിവ് തെളിയിച്ച നടന്മാരിൽ പ്രധാനിയാണ് നടൻ മോഹൻലാൽ. ഇതിനോടകം നിരവധി ഗാനങ്ങൾ മോഹൻലാലിന്റേതായി പ്രേക്ഷകർക്ക് മുന്നിലെത്തി. ഇപ്പോഴിതാ വീണ്ടുമൊരു സിനിമയിൽ ഗാനം ആലപിച്ചിരിക്കുകയാണ് താരം. ഷെയ്ൻ നിഗമിനെ നായകനാക്കി ടി കെ രാജീവ് കുമാർ സംവിധാനം ചെയ്യുന്ന ബർമുഡ എന്ന ചിത്രത്തിനായാണ് ഇത്തവണ ഗാനമാലപിക്കുന്നത്.
അതേസമയം ടി കെ രാജീവിന്റെ തന്നെ ‘കണ്ണെഴുതി പൊട്ടുംതൊട്ട്’ എന്ന ചിത്രത്തിൽ മോഹൻലാൽ പാടിയ ‘കൈതപൂവിൻ കന്നികുറുമ്പിൽ തൊട്ടു തൊട്ടില്ല എന്ന ഗാനം ഇന്നും സൂപ്പർ ഹിറ്റാണ്. ഇപ്പോൾ താരം തന്നെയാണ് പുതിയ പാട്ടിനെക്കുറിച്ചും പറഞ്ഞിരിക്കുന്നത്. ചിത്രത്തിന്റെ അണിയറ പ്രവർത്തകർ ഇറക്കിയ പ്രത്യേക വീഡിയോയിൽ മോഹൻലാൽ തന്നെയാണ് ഇക്കാര്യം പറഞ്ഞത്.
”ഇങ്ങനെയൊരു കാര്യം ടി.കെ. രാജീവ് കുമാർ ചോദിച്ചപ്പോൾ ഒട്ടും മടിയില്ലാതെ സമ്മതിച്ചുവെന്ന് മോഹൻലാൽ പറഞ്ഞു. ഓർക്കസ്ട്രേഷനാണ് പാട്ടിന്റെ ഏറ്റവും വലിയ പ്രത്യേകത. ബുഡാപെസ്റ്റിൽ നിന്നുള്ളവരാണ് അത് ചെയ്യുന്നത്. പിങ്ക് പാന്ഥർ ഇൻവെസ്റ്റിഗേഷൻ പോലുള്ള രസമുള്ള സംഗീതസംവിധാനമാണുള്ളത്. രമേഷ് നാരായണനാണ് ഈണമിട്ടിരിക്കുന്നത്. വിനായക് ശശികുമാറാണ് വരികൾ. ഇങ്ങനെയൊരു പാട്ട് പാടാൻ അവസരം ലഭിച്ചതിൽ സന്തോഷമുണ്ട്”, അദ്ദേഹം പറഞ്ഞു.
നവാഗതനായ കൃഷ്ണദാസ് പങ്കി രചന നിര്വ്വഹിച്ചിരിക്കുന്ന ‘ബര്മുഡ’യിൽ ഇന്ദുഗോപന് എന്ന കഥാപാത്രത്തെയാണ് ഷെയ്ന് നിഗം അവതരിപ്പിക്കുന്നത്. 24 ഫ്രെയിംസ് പ്രൊഡക്ഷൻസിന്റെ ബാനറിൽ സൂരജ് സി.കെ, ബിജു സി.ജെ, ബാദുഷ എൻ.എം എന്നിവരാണ് ബർമുഡ നിർമിക്കുന്നത്. കശ്മീരി നടി ഷെയ്ലീ കൃഷന് ആണ് ചിത്രത്തില് നായികയാവുന്നത്.