ദില്ലി : ഒരിടവേളയ്ക്ക് ശേഷം രാജ്യത്ത് കോവിഡ് കേസുകളുടെ എണ്ണത്തിൽ വർദ്ധനവ് രേഖപ്പെടുത്തുന്ന സാഹചര്യത്തിൽ രാജ്യത്ത് പ്രതിരോധവും ജാഗ്രതയും വർദ്ധിപ്പിക്കാൻ പ്രധാനമന്ത്രി നരേന്ദ്ര മോദി നിർദേശം നൽകി. മാസ്ക് ധരിക്കുന്നതിന് പ്രാമുഖ്യം നൽകണമെന്നും സാംപിളുകൾ ജനിതക ശ്രേണീകരണം നടത്തണമെന്നും പ്രധാനമന്ത്രി നിർദേശിച്ചു.
കോവിഡ് കേസുകൾ ഉയരുന്ന സാഹചര്യത്തിൽ കോവിഡ് തയ്യാറെടുപ്പുകൾ അവലോകനം ചെയ്യാൻ ഇന്നു വൈകുന്നേരം നടന്ന ഉന്നതല യോഗത്തിലായിരുന്നു പ്രധാനമന്ത്രിയുടെ നിർദേശം. ടെസ്റ്റ്–ട്രാക്ക്–ട്രീറ്റ്–വാക്സിനേഷൻ, കോവിഡ് ഉചിത പെരുമാറ്റം എന്നീ കാര്യങ്ങളിൽ ശ്രദ്ധ കേന്ദ്രീകരിക്കേണ്ടതിന്റെ ആവശ്യകത പ്രധാനമന്ത്രി ചൂണ്ടിക്കാട്ടി. രാജ്യത്ത് മരുന്നുകള് ഉൾപ്പെടെയുള്ളവയുടെ ലഭ്യത ബന്ധപ്പെട്ട അധികൃതർ ഉറപ്പാക്കണമെന്നും പ്രധാനമന്ത്രി നിർദേശിച്ചു.