പാലക്കാട്: അട്ടപ്പാടിയിൽ ആൾക്കൂട്ടക്കൊലപാതകത്തിനിരയായ മധുവിൻ്റെ കേസിൽ കൂടുതല്‍ ആരോപണങ്ങളുമായി കുടുംബം. മുക്കാലിയില്‍ നിന്ന് പോയ സമയത്ത് പോലിസ് (Police) ജീപ്പില്‍ വെച്ച്‌ എന്താണ് സംഭവിച്ചതെന്ന് വ്യക്തമാക്കണമെന്നും കൊല്ലപ്പെടുന്നതിന് ദിവസങ്ങള്‍ക്ക് മുമ്ബ് മധുവിനെ ആരോ തോക്കുചൂണ്ടി ഭീഷണിപ്പെടുത്തിയതായും കുടുംബം പറഞ്ഞു.
പോലിസ് ജീപ്പില്‍വച്ച്‌ മധുവിന് ക്രൂരമായ ആക്രമണം നേരിട്ടുവെന്ന ആരോപണം നേരത്തേ തന്നെ ഇയര്‍ന്നിരുന്നു. എന്നാല്‍, പോലിസിന്റെ ഇടപെടല്‍ മറച്ചുവച്ച്‌ നാട്ടുകാരെ മാത്രം പ്രതിസ്ഥാനത്തുനിര്‍ത്തിയാണ് അന്വേഷണം സംഘം കുറ്റപത്രം തയ്യാറാക്കിയിട്ടുള്ളത്.
സ്പെഷ്യൽ പബ്ലിക് പ്രോസിക്യൂട്ടറായി നിയമിക്കാനുള്ളവരുടെ പട്ടിക കുടുംബം സർക്കാരിന് സമർപ്പിച്ചു. നാല് അഭിഭാഷകരുടെ പേരുകളാണ് നൽകിയത്. സംസ്ഥാന ആഭ്യന്തര വകുപ്പ് അഡീഷണൽ ചീഫ് സെക്രട്ടറിക്കും ഡയറക്ടർ ജനറൽ ഓഫ് പ്രോസിക്യൂഷനുമാണ് പേരുകൾ കൈമാറിയത്. അഭിഭാഷകരുടെ പേരുകൾ വെളിപ്പെടുത്താനാവില്ലെന്ന് മധുവിന്റെ കുടുംബം പറഞ്ഞു.
