തിരുവനന്തപുരം: ആറ്റുകാല്‍ അംബാ പുരസ്‌കാരം (Attukal Amba Award) നടൻ മോഹൻലാലിന്. ഈ മാസം 17ന് ആറ്റുകാൽ പൊങ്കാല ദിവസം താരത്തിന് ആറ്റുകാല്‍ ക്ഷേത്ര ട്രസ്‌റ്റ് പുരസ്‌കാരം കൈമാറും. അന്ന് നടക്കുന്ന കലാപരിപാടികളുടെ ഉദ്‌ഘാടനവും അദ്ദേഹം തന്നെ നിർവ്വഹിക്കും.
അതേസമയം ആറ്റുകാല്‍ പൊങ്കാല ഈ മാസം 17ന് നടക്കും. ക്ഷേത്ര പരിസരത്ത് പണ്ടാര അടുപ്പിൽ മാത്രമായിരിക്കും പൊങ്കാല നടക്കുക. കോവിഡ് സാഹചര്യത്തിൽ പൊങ്കാല വീടുകളിൽ മാത്രമാണ് അനുവദിച്ചിട്ടുള്ളത്. ഒന്നാം ദിവസമായ ഫെബ്രുവരി ഒമ്പതിന് വൈകിട്ട് 6.30നാണ് കലാപരിപാടികളുടെ ഉദ്ഘാടനം. അന്ന് രാവിലെ 10.50ന് ദേവിയെ കാപ്പുകെട്ടി കുടിയിരുത്തുന്നതോടെയാണ് ഉത്സവം തുടങ്ങുക.
പൂർണ്ണമായും കോവിഡ് മാനദണ്ഡങ്ങൾ പാലിച്ചുകൊണ്ടാകും ഇത്തവണ ഉത്സവ ചടങ്ങുകൾ. അതേസമയം ഭക്തജനങ്ങൾ അവരവരുടെ വീടുകളിൽ പൊങ്കാല അർപ്പിക്കണമെന്നും ക്ഷേത്ര ട്രസ്‌റ്റ് ഭാരവാഹികൾ അറിയിച്ചു. കോവിഡ് വ്യാപനത്തിന്റെ പശ്ചാത്തലത്തില്‍ ഈ വര്‍ഷത്തെ ആറ്റുകാല്‍ പൊങ്കാല പരിമിതമായ രീതിയില്‍ നടത്താൻ തീരുമാനിച്ചതായി സർക്കാർ അറിയിച്ചിട്ടുണ്ട്.
