സോളാര്‍ കേസിലെ പ്രതിയുടെ പീഡന പരാതിയില്‍ പോലീസ് അറസ്റ്റ് ചെയ്ത പൂഞ്ഞാര്‍ മുന്‍ എംഎല്‍ എ പിസി ജോര്‍ജിന് ജാമ്യം. ഉപാധികളോടെ തിരുവനന്തപുരം വഞ്ചിയൂര്‍ ഒന്നാം ക്ലാസ് മജിസ്‌ട്രേറ്റ് കോടതി 3 ആണ് ജാമ്യം അനുവദിച്ചിരിക്കുന്നത്. പരാതിക്കാരിയേയോ സാക്ഷികളെയോ സ്വാധീനിക്കരുതെന്ന ഉപാധികളോടെയാണ് ജാമ്യം. കുറ്റപത്രം നല്‍കുന്നതു വരെ പിസി ജോര്‍ജ് ആഴ്ചയിലൊരിക്കല്‍ അന്വേഷണ ഉദ്യോഗസ്ഥന് മുന്നില്‍ ഹാജരാകണം.
മതവിദ്വേഷ പ്രസംഗത്തിലടക്കം മറ്റു കേസുകളിലും പ്രതിയാണ് പിസി ജോര്‍ജെന്നും ജാമ്യം ലഭിച്ചാല്‍ സാക്ഷികളെ സ്വാധീനിക്കുമെന്നും പ്രോസിക്യൂഷന്‍ കോടതിയില്‍ ശക്തമായി വാദിച്ചിരുന്നു. ജോര്‍ജിന് ആരോഗ്യപ്രശ്നങ്ങളുണ്ടെന്നും പരാതിക്കാരിക്ക് വിശ്വാസ്യതയില്ലെന്നും മുന്‍ മുഖ്യമന്ത്രിക്കെതിരെയും പീഡന പരാതി നല്‍കിയിട്ടുണ്ടെന്നും ജോര്‍ജിന്റെ അഭിഭാഷകന്‍ വാദിച്ചു. രാഷ്ട്രീയമായി കെട്ടിച്ചമച്ച കേസാണിതെന്നും പിസിയുടെ അഭിഭാഷകന്‍ കോടതിയെ അറിയിച്ചു. പ്രോസിക്യൂഷന്‍ വാദങ്ങളെ തള്ളിയാണ് കോടതി പി സി ജോര്‍ജിന് ജാമ്യം അനുവദിച്ചിരിക്കുന്നത്.
