ചാത്തന്നൂർ: ബൈക്കുകൾ കൂട്ടിയിടിച്ച് രണ്ട് യുവാക്കൾക്ക് ദാരുണാന്ത്യം. അപകടത്തിൽ മൂന്ന് പേർക്ക് പരിക്കേൽക്കുകയും ചെയ്തു. പാരിപ്പള്ളിപാമ്പുറം സ്മൃതി നിലയത്തിൽ വിഘ്നേഷ് (25), പരവൂർ നെടുങ്ങോലം ഒഴുകുപാറ ബിഎസ് ഭവനിൽ സുബിൻ സുന്ദരേശൻ (32) എന്നിവരാണ് മരിച്ചത്. ഒഴുകുപാറ പോളച്ചിറ താഴതിൽ വീട്ടിൽ രാഹുൽ(27) ചിറക്കരത്താഴം ചരുവിള വീട്ടിൽ സുധീൻ (20) ചിറക്കരത്താഴം പുതുവിള വീട്ടിൽ ഷിജിൻ (23) എന്നിവർക്കാണ് പരിക്കേറ്റത്.
കഴിഞ്ഞ ദിവസം രാത്രി പന്ത്രണ്ടോടെയായിരുന്നു അപകടം. പരവൂർ – പാരിപ്പള്ളി റോഡിൽ കോട്ടുവൻകോണം ക്ഷേത്രത്തിന് സമീപമായിരുന്നു അപകടം. എതിർ ദിശകളിൽ നിന്നും വന്ന ബൈക്കുകളാണ് കൂട്ടിയിടിച്ചത്. സുബിൻ സംഭവ സ്ഥലത്ത് വച്ച് മരിക്കുകയായിരുന്നു. വിഘ്നേഷിനെ തിരുവനന്തപുരം മെഡിക്കൽ കോളേജ് ആശുപത്രിയിലെത്തിച്ചെങ്കിലും മരണമടഞ്ഞു. ശബദം കേട്ട് ഓടി കൂടിയ നാട്ടുകാരും പരവൂർ പോലീസും ചേർന്നാണ് പരിക്കേറ്റവരെ ആശുപത്രികളിലെത്തിച്ചത്.