ആലപ്പുഴ: ജാതിപ്പേര് വിളിച്ച് അധിക്ഷേപിച്ചെന്ന പരാതിയിൽ തോമസ് കെ തോമസ് എംഎൽഎക്കും ഭാര്യ ഷേർളി തോമസിനും എതിരെ കേസെടുത്തു. എൻസിപി വനിതാ നേതാവിനെ ജാതി പറഞ്ഞതിക്ഷേപിച്ചു എന്ന പരാതിയിൽ പട്ടികജാതി പീഡന നിരോധന നിയമപ്രകാരമാണ് എംൽഎക്കും ഭാര്യക്കുമെതിരെ കേസെടുത്തത് . ഈ മാസം 9ന് ഹരിപ്പാട് നടന്ന എൻസിപി മണ്ഡലം കമ്മിറ്റി യോഗത്തിനിടയിലായിരുന്നു സംഭവം. നാഷനലിസ്റ്റ് മഹിളാ കോൺഗ്രസ് ആലപ്പുഴ ജില്ലാ പ്രസിഡന്റ് ആർ ബി ജിഷയുടെ പരാതിയിലാണ് പൊലീസ് കേസെടുത്തത്.
എൻസിപി യോഗത്തിനിടയിൽ ഹരിപ്പാട് മണ്ഡലത്തിൽ പെടാത്തവർ പുറത്ത് പോകണമെന്ന് ജിഷ ആവശ്യപ്പെട്ടതോടെയാണ് പ്രശ്നങ്ങൾക്ക് തുടക്കമായത് . ഇതിനിടെ കാക്കയെ പോലെ കറുത്തിരിക്കുന്നു തുടങ്ങിയ അധിക്ഷേപകരാമായ പരാമർശങ്ങൾ ഉന്നയിച്ചു എന്നതാണ് പരാതി. തോമസ് കെ തോമസ് എംഎൽഎ ഒന്നാം പ്രതിയും ഭാര്യ രണ്ടാം പ്രതിയുമാണ്. മണ്ഡലം പ്രസിഡൻ്റ് ക്ഷണിച്ചിട്ടാണ് താൻ യോഗത്തിൽ ചെന്നതെന്നും നിയമസഭയിൽ നിന്ന് തിരികെ വരുന്ന വഴിയായതുകൊണ്ടാണ് ഭാര്യ കൂടെയുണ്ടായതെന്നും എംഎൽഎ പറഞ്ഞു.
