കോഴിക്കോട്: തലശേരി മൂഴിക്കര കോപ്പാലത്തിനടുത്ത് കോണ്‍ഗ്രസ് നേതാവിന്റെ വീടിനുനേരെ പെട്രോള്‍ ബോംബേറ്. കോടിയേരി കോണ്‍ഗ്രസ് ബ്ലോക്ക് കമ്മിറ്റി അംഗം പി എം കനകരാജിന്റെ വീടിനുനേരെയാണ് ആക്രമണം ഉണ്ടായത്.
ആക്രമണം നടക്കുമ്പോള്‍ കനകരാജ് വീട്ടിലുണ്ടായിരുന്നില്ല. അമ്മയും ഭാര്യയുമായിരുന്നു വീട്ടിലുണ്ടായിരുന്നത്. വീടിന്റെ ജനലുകള്‍ക്ക് കേടുപാടുകള്‍ സംഭവിച്ചിട്ടുണ്ട്. ഇതിനുപിന്നിലുള്ള പ്രകോപനം, ആരാണ് എറിഞ്ഞതെന്ന് സംബന്ധിച്ചുള്ള കാര്യങ്ങള്‍ കണ്ടെത്തേണ്ടതുണ്ട്. ഇതുസംബന്ധിച്ച്‌ പൊലീസ് അന്വേഷണം ആരംഭിച്ചിട്ടുണ്ട്.
ഇതിനിടെ സംസ്ഥാനത്ത് അക്രമം വ്യാപിപ്പിക്കാന്‍ ഇടതുപക്ഷത്തിന്റെ ശ്രമമെന്ന് കെ.പി.സി.സി പ്രസിഡന്റ് കെ.സുധാകരന്‍ പറഞ്ഞു. വാ തുറന്നാല്‍ നുണ പറയുന്ന നേതൃത്വമാണ് സിപിഐഎമ്മിന്റേതെന്നും അദ്ദേഹം വിമര്‍ശിച്ചു. ഓഫീസുകള്‍ അടിച്ചുപൊളിക്കാനും ബോംബെറിയാനും കോണ്‍ഗ്രസിന് അറിയാം. ഈ രീതിയിലാണ് ഭരണമെങ്കില്‍ സര്‍ക്കാരിന്റെ പതനം ഉടനെന്നും കെ സുധാകരന്‍ പറഞ്ഞു. അക്രമത്തിനൊടുവില്‍ സിപിഐഎമ്മിന് തലകുനിക്കേണ്ടിവരും. എല്‍ഡിഎഫ് ആക്രമണങ്ങള്‍ക്ക് ജനം തിരിച്ചടി നല്‍കും.
അതേസമയം കോഴിക്കോട് തിക്കോടി ടൗണില്‍ കോണ്‍ഗ്രസ് ഓഫീസിനുനേരെ ബോംബേറ് നടന്നു. കൊലവിളി പ്രകടനം നടത്തി സിപിഐഎംഎം പ്രവര്‍ത്തകര്‍ രംഗത്തെത്തി.ഷുഹൈബിനെയും കൃപേഷിനെയും ഓര്‍മ്മയില്ലേ എന്ന മുദ്രാവാക്യം ഉയര്‍ത്തിയാണ് കൊലവിളി പ്രകടനം നടത്തിയത്. വല്ലാണ്ടങ്ങ് കളിച്ചാല്‍ വീട്ടില്‍ കയറി കൊത്തിക്കീറും എന്നും പ്രവര്‍ത്തകര്‍ മുദ്രാവാക്യം മുഴക്കി.
