ഭക്ഷണത്തോടൊപ്പം ഇടയ്ക്കിടെ വെള്ളം കുടിക്കുന്ന ശീലം നമ്മളില് പലര്ക്കും ഉണ്ട്. ചിലര് ഇടയ്ക്കിടയ്ക്കും മറ്റു ചിലര് ഭക്ഷണത്തിനിടയില് ഒന്നോ രണ്ടോ സിപ്പോ വെള്ളം കുടിക്കാറുണ്ട്. ഭക്ഷണത്തിനിടയില് ധാരാളം വെള്ളം കുടിക്കുന്നത് നല്ലതല്ലെന്നാണ് പറയപ്പെടുന്നത്. വെള്ളം കുടിക്കുന്നത് ഭക്ഷണം ദഹിപ്പിക്കാന് സഹായിക്കുമെങ്കിലും ഭക്ഷണം കഴിക്കുമ്പോള് വെള്ളം കുടിക്കുന്നത് വിപരീത ഫലമുണ്ടാക്കിയേക്കാം. ഭക്ഷണം കഴിക്കുമ്പോള് വെള്ളം കുടിക്കുന്നത് ദഹനത്തെ മോശമായി ബാധിക്കുമെന്ന് പറയപ്പെടുന്നു.
വിദഗ്ധരുടെ അഭിപ്രായത്തില് ഭക്ഷണം കഴിക്കുന്നതിന് മുപ്പത് മിനിറ്റ് മുമ്പോ മുപ്പത് മിനിറ്റിനു ശേഷമോ വെള്ളം കുടിക്കണം. ദഹന സമയത്ത്, ആമാശയത്തില് അടങ്ങിയിരിക്കുന്ന ആസിഡുകളാണ് നമ്മള് കഴിക്കുന്ന ഭക്ഷണത്തെ വിഘടിപ്പിക്കാന് സഹായിക്കുന്നത്. എന്നാല് ഭക്ഷണത്തോടൊപ്പം വെള്ളം കുടിക്കുമ്പോള് അത് വയറിലെ ആസിഡിനെ നേര്പ്പിക്കുമെന്നും ഇത് ദഹനത്തെ ദോഷകരമായി ബാധിക്കുമെന്നും ചില വിദഗ്ധര് അഭിപ്രായപ്പെടുന്നുണ്ട്. എന്നാല് ചില പഠനങ്ങളില് ഭക്ഷണത്തോടൊപ്പം വെള്ളം കുടിക്കുന്നത് ദഹനത്തെ ബാധിക്കില്ലെന്നും കണ്ടെത്തിയിട്ടുണ്ട്
