തിരുവനന്തപുരം: മുഖ്യമന്ത്രി പിണറായി വിജയനെ വിമര്‍ശിച്ച് കെ.പി.സി.സി പ്രസിഡന്റ് കെ. സുധാകരന്‍. ലൈഫ് മിഷന്‍ കോഴയുമായി ബന്ധപ്പെട്ട് പ്രതിപക്ഷം അടിയന്തര പ്രമേയം സഭയിൽ അവതരിപ്പിക്കുകയുണ്ടായി. എന്നാൽ മാത്യു കുഴൽനാടൻ ചോദിച്ച ചോദ്യങ്ങൾക്ക് മുഖ്യമന്ത്രി ശരിയായ രീതിയിൽ മറുപടി നൽകിയിരുന്നില്ല. പഴയ വിജയൻ ആരാണെന്ന് അറിയണമെങ്കിൽ സുധാകരനോട് ചോദിച്ചാൽ മതി എന്ന ചോദ്യമാണ് കെ.സുധാകരനെ ചൊടിപ്പിക്കാൻ കാരണമായത്.
നിയമസഭയില്‍ ഉന്നയിക്കുന്ന കാതലായ വിഷയങ്ങളില്‍ മറുപടി ഇല്ലാതാകുമ്പോള്‍ പണ്ട് അടി കൊണ്ടു ഓടിയ കാര്യങ്ങള്‍ ചര്‍ച്ചയാക്കി രക്ഷപ്പെടാന്‍ ശ്രമിക്കുന്ന ഒരു ഭീരുവായി മുഖ്യമന്ത്രി അധഃപതിക്കരുതായിരുന്നെന്ന് കെ. സുധാകരന്‍ മുഖ്യമന്ത്രിയെ വിമര്‍ശിച്ചു. എത്ര തന്നെ ഒഴിഞ്ഞു മാറാന്‍ ശ്രമിച്ചാലും രാഷ്ട്രീയ ജീവിതത്തിലുടനീളം കാണിച്ചു കൂട്ടിയ വൃത്തികേടുകള്‍ക്ക് മറുപടി പറയാതെ പോകാൻ മുഖ്യമന്ത്രിക്ക് കഴിയില്ല. സഭയിലെ യു.ഡി.എഫ്‌ എം.എൽ.എമാരുടെ ചോദ്യങ്ങളില്‍ നിന്ന് മുഖ്യമന്ത്രിക്ക് ഒരിക്കലും രക്ഷ നേടാൻ കഴിയില്ലെന്നും കെ.സുധാകരൻ ആഞ്ഞടിച്ചു.
എന്തിനേറെ പറയുന്നു, ഊണിലും ഉറക്കത്തിലും കൂടെ നടന്നിരുന്ന സ്വപ്ന സുരേഷിനെ പോലും അറിയില്ലെന്ന് ഒരുളുപ്പുമില്ലാതെ പറഞ്ഞയാളാണ് പിണറായി വിജയന്‍. സ്വപ്ന സുരേഷിന് ഒപ്പമുള്ള ദൃശ്യങ്ങൾ പുറത്തുവന്നിട്ടും സ്വപ്നയുമായി ഒരു പരിചയവുമില്ല എന്ന രീതിയിലാണ് ഇപ്പോഴും മുഖ്യമന്ത്രി കള്ളങ്ങള്‍ പറയുന്നത്. സ്വപ്നയുമായുള്ള രഹസ്യ കൂടിക്കാഴ്ചയെ പറ്റി മാത്യു കുഴൽനാടൻചോദ്യം ചോദിച്ചപ്പോൾ തന്നെ മുഖ്യമന്ത്രി ഭയന്നു. താനും സംഘവും നടത്തിയിട്ടുള്ള കോടികളുടെ അഴിമതി പുറത്തുവരുമോ എന്ന ഭയം മുഖ്യമന്ത്രിയുടെ ശരീരഭാഷയില്‍ ഉടനീളം ഉണ്ട് എന്നും മുഖ്യമന്ത്രിയെ കെ. സുധാകരൻ പരോക്ഷമായി വിമർശിച്ചു.
