മുംബൈ: വീര സവര്ക്കറിന്റെ ജീവിതം പറയുന്ന ബോളിവുഡ് ചിത്രം ‘സ്വതന്ത്ര്യ വീര് സവര്ക്കര്’ നാളെ തിയറ്ററുകളിലേക്ക്. ബോളിവുഡ് താരം രണ്ദീപ് ഹൂഡ ആദ്യമായി സംവിധാനം ചെയ്യുന്ന ചിത്രമാണിത്.
രൺദീപ് ഹൂഡ സവര്ക്കറായി എത്തുന്ന ചിത്രത്തിൽ അങ്കിത ലോഖണ്ഡേ, അമിത് സിയാൽ എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
സവര്ക്കറാവാൻ വലിയ ശാരീരികമായ തയാറെടുപ്പുകളാണ് രണ്ദീപ് നടത്തിയത്. കഥാപാത്രത്തിനായി 18 കിലോയിലധികം ഭാരമാണ് നടൻ കുറച്ചത്. ലണ്ടൻ, മഹാരാഷ്ട്ര, ആൻഡമാൻ എന്നിവിടങ്ങളാണ് ചിത്രീകരണം നടന്നത്. സീ സ്റ്റുഡിയോസ്, ആനന്ദ് പണ്ഡിറ്റ്, രണ്ദീപ് ഹൂഡ, സന്ദീപ് സിംഗ്, യോഗേഷ് രഹാര് എന്നിവര് ചേര്ന്നാണ് നിര്മ്മാണം. രൂപ പണ്ഡിറ്റ്, സാം ഖാന്, അന്വര് അലി, പാഞ്ചാലി ചക്രവര്ത്തി എന്നിവര് സഹനിര്മ്മാണം.
രചന ഉത്കര്ഷ് നൈതാനി, രണ്ദീപ് ഹൂദ, ഛായാഗ്രഹണം അര്വിന്ദ് കൃഷ്ണ, പ്രൊഡക്ഷന് ഡിസൈന് നിലേഷ് വാഗ്, എഡിറ്റിംഗ് രാജേഷ് പാണ്ഡേ, പശ്ചാത്തല സംഗീതം മത്തിയാസ് ഡ്യുപ്ലെസ്സി, സൗണ്ട് ഡിസൈന് ഗണേഷ് ഗംഗാധരന്, എക്സിക്യൂട്ടീവ് പ്രൊഡ്യൂസര് രൂപേഷ് അഭിമന്യു മാലി, വസ്ത്രാലങ്കാരം സച്ചിന് ലൊവലേക്കര്, കാസ്റ്റിംഗ് പരാഗ് മെഹ്ത, മേക്കപ്പ് ഡിസൈന് രേണുക പിള്ള, പബ്ലിസിറ്റി പറുള് ഗൊസെയ്ന്, വിഎഫ്എക്സ് വൈറ്റ് ആപ്പിള് സ്റ്റുഡിയോ, ഡിഐ പ്രൈം ഫോക്കസ്, കളറിസ്റ്റ് ആന്ഡ്രിയാസ് ബ്രൂക്കല്, ഡിജിറ്റല് മാര്ക്കറ്റിംഗ് സ്റ്റുഡിയോ ഉനൂസ്.
ഏറ്റവും തെറ്റിദ്ധരിക്കപ്പെട്ട വ്യക്തിയാണ് സവര്ക്കര്. അതുകൊണ്ടാണ് ഈ ചിത്രം ചെയ്യാന് തെരഞ്ഞെടുത്തത് എന്നാണ് പ്രഖ്യാപന വേളയില് രണ്ദീപ് പറഞ്ഞത്. നമുക്ക് സ്വാതന്ത്ര്യം ലഭിക്കുന്നതില് പങ്ക് വഹിച്ച നിരവധി നായകന്മാരുണ്ട്. എന്നിരുന്നാലും, എല്ലാവര്ക്കും അവരുടെ പങ്കിന്റെ പ്രാധാന്യം ലഭിച്ചിട്ടില്ല. ഏറ്റവും തെറ്റിദ്ധരിക്കപ്പെട്ടതും ചര്ച്ച ചെയ്യപ്പെടുന്നതും സ്വാധീനിച്ചതുമായ വിനായക് ദാമോദര് സവര്ക്കറുടെ ജീവിത കഥ പറയേണ്ടതുണ്ട്. തന്നെ ആ കഥാപാത്രം ചെയ്യാന് തെരഞ്ഞെടുത്തതില് സന്തോഷമുണ്ടെന്നാണ് സിനിമ പ്രഖ്യാപന വേളയില് രണ്ദീപ് ഹൂഡ പറഞ്ഞത്.