ഭോപ്പാൽ: ‘ദി കേരള സ്റ്റോറി’ കണ്ടതിനു പിന്നാലെ കാമുകനെതിരെ പരാതിയുമായി കാമുകി. തന്നോട് മതം മാറാന് ആവശ്യപ്പെടുന്നു എന്ന ആരോപണം ഉന്നയിച്ചാണ് യുവതി പോലീസ് സ്റ്റേഷനിൽ എത്തിയത്. സംഭവത്തില് 23 കാരനെ അറസ്റ്റ് ചെയ്തു. മദ്ധ്യപ്രദേശിലെ ഖജ്റാനയിലാണ് സംഭവം.
മതംമാറ്റത്തിന് നിര്ബന്ധിച്ചുവെന്ന പരാതിക്കൊപ്പം ലൈംഗിക പീഡന പരാതിയും യുവാവിനെതിരെ രജിസ്റ്റര് ചെയ്തതായി പോലീസ് വ്യക്തമാക്കി. വിവാഹവാഗ്ദാനം നല്കിയാണ് യുവാവ് യുവതിയെ പീഡിപ്പിച്ചത്. ഇരുവരും ഒന്നിച്ചായിരുന്നു താമസം. ഇതിനിടയിലാണ് മതംമാറാന് ഇയാള് സ്ഥിരമായി യുവതിയെ നിര്ബന്ധിച്ചുകൊണ്ടിരുന്നത്. ഇത് തന്നെ മാനസികമായി തളര്ത്തിയെന്നും യുവതി പോലീസില് അറിയിച്ചു.
പ്ലസ് ടു പഠനം അവസാനിപ്പിച്ച യുവാവ് നിലവില് തൊഴില്രഹിതനാണ്. ഉന്നതപഠനം നേടിയിട്ടുള്ള യുവതി ഒരു സ്വകാര്യ കമ്പനിയില് ജോലി ചെയ്തുവരികയാണ്. നാല് വര്ഷം മുന്പ് ഒരു കോച്ചിങ് സെന്ററില് വച്ച് പരിചയപ്പെട്ട ഇരുവരും പ്രണയത്തിലാകുകയായിരുന്നു.
കാമുകനൊപ്പമാണ് യുവതി ‘ദി കേരള സ്റ്റോറി’ കാണാന് പോയത്. സിനിമ കണ്ട് തിരിച്ചെത്തിയതിനു ശേഷം ഇരുവരും തമ്മില് തര്ക്കമുണ്ടായി. യുവാവ് വീട്ടില് നിന്ന് ഇറങ്ങിപ്പോയി. ഇതിനുപിന്നാലെയാണ് യുവതി പോലീസില് പരാതിയുമായി എത്തിയത്. യുവതിയുടെ പരാതിയില് അന്വേഷണം നടന്നുവരികയാണെന്ന് പോലീസ് അറിയിച്ചു.